अमेरिकी नागरिकांची फसवणूक करणारे अटकेत; आयटी पार्क हिंजवडीमधील कॉल सेंटरवर छापा

कंपनीचा मालक सागर कुमार यादव (वय ३२, रा. हिंजवडी), व्यवस्थापक आनंद पंकज सिन्हा (वय २९, रा. वृंदावन सोसायटी, वाघोली) टेक लॉ सोलुशन कॉल सेंटरचा मालक धनंजय साहेबराव कासार (वय २५, रा. माण, ता. मुळशी) व व्यवस्थापक हर्षद शंकर खामकर (वय २८, रा. हिंजवडी) अशी अटक आरोपींची नावे आहेत. या दोन्ही कॉल सेंटरमधील एकूण १८ कर्मचाऱ्यांविरुद्ध गुन्हा दाखल करण्यात आला आहे. अटक आरोपींना न्यायालयात हजर केले असता १८ नोव्हेंबरपर्यंत पोलीस कोठडीत ठेवण्याचे आदेश न्यायालयाने दिले.

पिंपरी-चिंचवड पोलीस आयुक्तालय हद्दीत हिंजवडी भागात वेगवेगळे बनावट कॉल सेंटर असल्याची माहिती पोलीस आयुक्त विनयकुमार चौबे यांना प्राप्त झाली होती. त्या अनुषंगाने पोलीस आयुक्तांनी सायबर पोलीस ठाणे व गुन्हे शाखा युनिट दोनची दोन पथके तयार करुन संबधित कॉल सेंटरवर छापा टाकून कारवाई करण्याबाबत आदेश दिले होते. त्यानुसार सायबर ठाण्याचे वरिष्ठ पोलीस निरीक्षक रविकिरण नाळे व युनिट दोनचे वरिष्ठ पोलीस निरीक्षक अरविंद पवार यांच्या पथकाने हिंजवडी टप्पा येथील दोन वेगवेगळ्या अनधिकृत कॉल सेंटरवर छापा टाकला.

या दोन्ही कॉल सेंटरमधील कर्मचारी अमेरिकेतील नागरिकांशी वेगवेगळ्या नावाने इंग्रजीमध्ये अमेरिकेतून वैद्यकीय विभागातून बोलत असल्याचे सांगत होते. तसेच, काही औषधांमुळे कर्करोग होतो, असे सांगून ही औषधे वापरणाऱ्या व्यक्तींची कॉलद्वारे माहिती घेत असत. त्यांना सबंधित कंपनीविरोधात न्यायालयात जाण्यासाठी व त्यामधून चांगली भरपाई मिळवून देण्याचे आमिष दाखवून त्यांची माहिती अमेरिकेतील वकिलांची संस्था (लॉ फर्मला) दिली जात असे. त्यानंतर लॉ फर्मकडून डॉलर स्वरुपात कमिशनची रक्कम प्राप्त करण्यात येत होती.

त्याचप्रमाणे स्काय हाय तोलुशन या कॉल सेंटरवरून अमेरिकेतील लोकांना आर्थिक कंपनीतून बोलत असल्याचे सांगून कर्ज मिळवून देण्याचे आमिष दाखवले जात होते. लिंकद्वारे त्यांच्या बँक खात्याची माहिती घेऊन त्यांना त्यांचा क्रेडिट स्कोअर खराब असल्याचे सांगून, तो चांगला करून देण्यासाठी गिफ्ट व्हाउचर, डॉलरच्या माध्यमातून रक्कम घेत असल्याचेही उघड झाले. या दोन्ही कॉल सेंटरवरून इलेक्ट्रॉनिक साहित्य, संगणक, लॅपटॉप जप्त करण्यात आले आहेत.