पाणी उपसा केंद्राचा वीजपुरवठा खंडित, पिंपरी-चिंचवडचा पाणीपुरवठा विस्कळीत, पवना धरणात ५५ टक्के पाणीसाठा

पिंपरी-चिंचवड शहर, एमआयडीसह काही नगरपालिका व ग्रामपंचायत यांना पवना धरणातून पाणीपुरवठा केला जाताे. यंदा पाऊस लांबल्याने धरणातील पाणीसाठा १६ टक्क्यांवर आला हाेता. जलसंपदा विभागाने १९ जूनपासून १५ टक्के पाणीकपात केली होती. १ जुलैपासून शहरासह मावळ तालुका परिसरात पावसाची संततधार सुरू होती.

रविवारपर्यंत धरणात २७.६२ टक्के पाणीसाठा झाला होता. रविवार रात्रीपासून सुरू असलेल्या पावसामुळे धरणातील पाणीसाठा वाढून ५५.०७ टक्क्यांवर गेला. गेल्या २४ तासांत धरण परिसरात ४२६ मिलिमीटर पावसाची नोंद झाली आहे. आतापर्यंत धरण परिसरात एकूण १ हजार २०८ मिलिलीटर पाऊस झाला आहे.

पाणी उपसा केंद्राचा वीजपुरवठा खंडित

रावेत येथील पाणी उपसा केंद्राचा वीजपुरवठा खंडित झाल्यामुळे पाण्याचा उपसा तात्पुरता बंद झाला आहे. त्यामुळे सेक्टर २३ जलशुद्धीकरण केंद्राचे पंपिंग बंद ठेवण्यात आले आहे. रावेत येथील वीजपुरवठा पूर्ववत झाल्यानंतर पाण्याचा उपसा सुरू करण्यात येईल. त्यानंतर पाणीपुरवठा टप्प्याटप्प्याने पूर्ववत केला जाईल. नागरिकांनी उपलब्ध पाण्याचा काटकसरीने वापर करावा, असे आवाहन महापालिकेच्या
पाणीपुरवठा विभागाने केले आहे.

शहराला दररोज होणारा पाणीपुरवठा

पवना धरण – ५५० दशलक्ष लीटर
आंद्रा धरण – ८० दशलक्ष लीटर
एमआयडीसी – २० दशलक्ष लीटर
एकूण – ६५० दशलक्ष लीटर

साडे सहा वर्षांपासून दिवसाआड पाणीपुरवठा

सर्वांना मुबलक व पुरेसे पाणी मिळण्यासाठी महापालिकेने नोव्हेंबर २०१९ मध्ये काही दिवसांसाठी एक दिवसाआड पाणीपुरवठा सुरु केला होता. काही दिवसांसाठीचा एक दिवसाआडचा पाणीपुरवठा पुढे कायम ठेवण्यात आला आहे. साडे सहा वर्षे पूर्ण झाली, तरी एक दिवसाआडच पाणीपुरवठा होत आहे. वाढीव पाणी मिळत नाही, तोपर्यंत दररोज पाणीपुरवठा करणे शक्य नसल्याचे प्रशासन सांगत आहे.

शहराची लोकसंख्या ३८ लाख, दिवसाला ६५० एमएलडी पाण्याची आवश्यकता

पिंपरी-चिंचवड शहराच्या वाढत्या लोकसंख्येला शुद्ध, सुरक्षित आणि अखंड पाणीपुरवठा करण्याच्या उद्देशाने पवना धरण ते सेक्टर २३, निगडी येथील जलशुद्धीकरण केंद्रादरम्यान पवना थेट समांतर जलवाहिनी प्रकल्प राबविण्यात येणार आहे. पवना धरणातील पाणी प्रदूषणमुक्त व विश्वासार्ह पद्धतीने थेट जलशुद्धीकरण केंद्रापर्यंत पोहोचविणे हे या प्रकल्पाचे प्रमुख उद्दिष्ट आहे.

सध्या पिंपरी-चिंचवड शहराची लोकसंख्या सुमारे ३८ लाख असून दररोज सुमारे ६५० एमएलडी पाणीपुरवठा केला जातो. त्यामध्ये पवना नदीतून ५२० एमएलडी, इंद्रायणी नदीतून १०० एमएलडी आणि एमआयडीसीमार्फत ३० एमएलडी पाणी उपलब्ध होते. सध्याची पाण्याची मागणी ६५५ एमएलडी असून मंजूर पाणी आरक्षण ७७६ एमएलडी आहे. लोकसंख्या वाढीचा वेग लक्षात घेता हे आरक्षण २०२९ पर्यंत पुरेसे राहील, असा अंदाज आहे. प्रस्तावित लोकसंख्या अंदाजानुसार २०३१ मध्ये ५५ लाख, २०४१ मध्ये ९५ लाख आणि २०५१ मध्ये १ कोटी ३५ लाख लोकसंख्या होण्याची शक्यता असून त्यानुसार अनुक्रमे ९४९ एमएलडी, १,६३८ एमएलडी आणि २,३२८ एमएलडी पाण्याची आवश्यकता भासणार आहे.