पुण्यात भारतीय जनता पक्षाचे नगरसेवक धीरज घाटे यांच्या अंगरक्षकाला सराईताने धक्काबुक्की केल्याची घटना आंबिलओढा वसाहतीत घडली. यानंतर पोलिसांनी सरकारी कामात अडथळा आणल्या प्रकरणी सराईतास अटक केली. विकी उर्फ अतुल वामन क्षीरसागर (रा. आंबिलओढा वसाहत, सदाशिव पेठ) असे अटक करण्यात आलेल्या आरोपीचे नाव आहे.
याबाबत पोलीस शिपाई अमोल शिंदे यांनी दत्तवाडी पोलीस ठाण्यात फिर्याद दिली आहे. काही महिन्यांपूर्वी घाटे यांच्यावर पाळत ठेवून त्यांच्यावर हल्ला करण्याचा प्रयत्न करण्यात आला होता. त्यानंतर घाटे यांना पोलीस संरक्षण देण्यात आले होते. पोलीस शिपाई शिंदे नगरसेवक घाटे यांचे अंगरक्षक आहेत. हनुमान जयंतीनिमित्त आंबिलओढा वसाहतीत आयोजित करण्यात आलेल्या महाप्रसाद कार्यक्रमाला घाटे उपस्थित होते. त्यावेळी घाटे यांच्या बरोबर असलेला सहकारी महेश आवळेशी आरोपी क्षीरसागरने वाद घालण्यास सुरुवात केली.
हेही वाचा : पुण्यातील कागत्र भागात भिंतीवर डोके आपटून तीन वर्षांच्या बालिकेचा खून, सावत्र वडील अटकेत
पोलीस शिपाई शिंदे यांनी महेश आवळे आणि आरोपी क्षीरसागर यांच्यातील वाद सोडविण्याचा प्रयत्न केला. तेव्हा आरोपी क्षीरसागर पोलीस शिपाई शिंदे यांच्या अंगावर धावून गेला. ‘तू मला कोण सांगणार’, असे सांगून त्याने शिंदे यांना धक्काबुक्की केली. शिंदे यांच्या दंडावर ओरखडले, असा आरोप आहे. या प्रकरणी सरकारी कामात अडथळा आणल्या प्रकरणी क्षीरसागरवर गुन्हा दाखल करण्यात आला आहे. पोलीस उपनिरीक्षक कस्पटे तपास करत आहेत.
