मुंबईऐवजी जरांगेंच्या आंदोलनाचा केंद्रबिंदू दिल्लीकडे; ॲड. प्रकाश आंबेडकर यांचा दावा

आंबेडकर म्हणाले, “मागण्याच अशा करायच्या की ज्या मान्यच होणार नाहीत आणि त्यातून डोके भडकवण्याचे काम सुरू ठेवायचे, या गोष्टीला आता आळा बसला पाहिजे. सामाजिक, आर्थिक आणि शैक्षणिकदृष्ट्या मागासलेपणा सिद्ध करण्यासाठी आवश्यक माहिती आणि आकडेवारी सरकारने न्यायालयासमोर ठेवावी. ती घटनेच्या चौकटीत आहे की नाही, याची तपासणी करून न्यायालय निर्णय देईल. मात्र, कोणत्यातरी प्रवर्गात जाऊन आरक्षण मागताना त्या प्रवर्गाचे निकष पूर्ण करावे लागतात. ओबीसी नेत्यांमध्ये एकवाक्यता नसल्याचे दिसत असले तरी, लढणारा ओबीसी वर्ग आणि ओढून-ताणून ओबीसींचे नेतृत्व करणारा वर्ग वेगळा आहे. त्यामुळे ओबीसी नेत्यांनीच या प्रश्नावर अधिक बोलणे योग्य ठरेल.’

‘राष्ट्रीय स्वयंसेवक संघाचे सरसंघचालक मोहन भागवत यांचे अमेरिकेतील भाषण ऐकले असेल. आपण सर्वांना सोबत घेऊन चालतो, असे जगाला सांगायचे आणि भारतात आल्यानंतर एकमेकांना दूर लोटायचे, अशी दुटप्पी भूमिका चळवळीत आणि राजकारणात असू नये,’ अशी टिप्पणी आंबेडकर यांनी केली. पंतप्रधान नरेंद्र मोदी यांना मि‌ळालेल्या पुरस्काराबाबत मिळाल्याबाबत ‘भारतामध्ये एक पुरस्कार घेता आला नाही आणि छोट्या देशांना धमकावून पुरस्कार घेत आहेत,’ अशी टीका आंबेडकर यांनी केली.

गणेशोत्सवाच्या पार्श्वभूमीवर डीजेचा मुद्दा उपस्थित होत आहे, त्यावर आंबेडकर म्हणाले, ‘ध्वनी हा आता परिणाम करणारा घटक झाला आहे. त्यामुळे सर्वोच्च न्यायालयाने ठरवून दिलेली डेसिबलची मर्यादा सर्वांनी पाळली पाहिजे. देवाच्या नावाने, लग्नाच्या निमित्ताने किंवा मोर्चाच्या निमित्ताने ध्वनिवर्धक वापरला तरी नियम सर्वांसाठी समान असले पाहिजेत.’

राहुल गांधींचा थेट संवाद नाही

‘लोकसभेतील विरोधीपक्ष नेते राहुल गांधी यांच्या पुण्यातील विद्यार्थ्यांशी संवाद कार्यक्रमाबाबत संवादाचा अभाव असल्याची टीका प्रकाश आंबेडकर यांनी केली. विद्यार्थ्यांना आधी प्रश्न न देता त्यांच्याकडून थेट प्रश्न घेऊन राहुल गांधी यांनी त्यांना उत्तरे दिली असती, तर संवाद अधिक जिवंत झाला असता. सध्याच्या कार्यक्रमातून विद्यार्थ्यांशी थेट संवाद झाल्याचे दिसले नाही,’ अशी टिप्पणी आंबेडकर यांनी केली.