पुण्यातील येरवडा औद्योगिक वसाहतीच्या परिसरात कबुतर चोरीचा आरोप करीत लहान मुलाला बॅट आणि पट्टयाने मारहाण केल्याची घटना घडली आहे. या प्रकरणाचा व्हिडिओ समोर आला असून या प्रकरणी तिघांना ताब्यात घेण्यात आले आहे. पोलिसांनी दिलेल्या माहितीनुसार, येरवडा औद्योगिक वसाहतीच्या परिसरात असलेल्या अनुसयाबाई सावंत शाळेच्या परिसरात बुधवारी दुपारच्या सुमारास एका लहान मुलावर कबुतर चोरल्याचा आरोप तिघांनी केला. त्यानंतर त्याला शिवीगाळ करत बॅट आणि पट्टयाने बेदम मारहाण केली गेली. हा प्रकार मुलाच्या आई-वडिलांना समजताच, त्यांनी पोलिसांकडे तक्रार दिली. यानंतर तिन्ही आरोपींना ताब्यात घेण्यात आले आहे. या प्रकरणी तपास सुरू असल्याचे येरवडा पोलिसांनी सांगितले.