वनक्षेत्र ‘सर्व्हेअर’ ‘एसीबी’च्या जाळ्यात; अरण्येश्वर भागात कारवाई

उदयसिंग भीमराव कुंभार (वय ४६, सध्या रा. कात्रज, मूळ रा. सातारा) असे ताब्यात घेण्यात आलेल्या वन विभागातील मोजणी कर्मचाऱ्याचे नाव आहे. या प्रकरणी कुंभार याच्याविरुद्ध सहकारनगर पोलीस ठाण्यात भ्रष्टाचार प्रतिबंध अधिनियमान्वये गुन्हा दाखल करण्यात आला आहे.

लाचलुचपत प्रतिबंधक विभागातील अधिकाऱ्यांनी दिलेल्या माहितीनुसार, तक्रारदार हे जमीन खरेदी-विक्री व्यवसाय करतात. वडगाव मावळ तालुक्यातील चिखलसेगाव, आपटी, कुणेनामा या गावात तक्रारदाराने जमीन खरेदी केली आहे. काही जमिनींच्या सातबारा उताऱ्यावर खासगी वनाचे शेरे लागले होते. हे शेरे काढून टाकण्यासाठी त्यांनी महसूल विभागाकडून आदेश मिळवून त्या बाबतच्या नोेंदी वन विभागाच्या कागदपत्रांवर घेण्यासाठी अर्ज दिला होता.

या बाबतची प्रत मिळविण्यासाठी त्यांनी सेनापती बापट रस्त्यावरील उपवनसंरक्षक कार्यालयात अर्ज केला होता. या अर्जाच्या चौकशीसाठी ते वन विभागाच्या कार्यालयात गेले. हे काम वन क्षेत्र मोजणी कर्मचारी उदयसिंग कुंभार यांच्याकडे असल्याची माहिती त्यांना मिळाली. कुंभार यांनी ११ आदेशांपैकी (रिस्टोर्ड ऑर्डर) ७ आदेशांच्या प्रती कार्यालयात आहेत. त्यासाठी सात लाख रुपयांची लाच कुंभार यांनी तक्रारदाराकडे मागितली. त्यानंतर तक्रारदाराने तडजोडीत चार लाख रुपये देण्याचे मान्य केले. रविवारी अरण्येश्वर भागात एसबीच्या पथकाने सापळा लावला. तक्रारदाराकडून चार लाख रुपयांची लाच घेताना कुंभार याला पकडले. एसीबीचे पोलीस अधीक्षक शिरीष सरदेशपांडे, अतिरिक्त अधीक्षक अजित पाटील, अर्जुन भोसले यांच्या मार्गदर्शनाखाली सहायक पोलीस आयुक्त सतीश वाळके आणि पथकाने ही कारवाई केली. पोलीस निरीक्षक प्रसाद लोणारे तपास करत आहेत.