पुणे: मुंबई-बंगळुरू बाह्यवळण मार्गावर दरी पूल परिसरात प्रवासी वाहतूक करणाऱ्या बसवर ट्रक आदळून ट्रक चालकाचा मृत्यू झाल्याची घटना घडली. अपघातात बसमधील प्रवासी जखमी झाले.हुसेन अब्बास सय्यद (वय ५५, रा. शिरा टाऊन, मंगळापेठ, कर्नाटक ) असे मृत्युमुखी पडलेल्या ट्रक चालकाचे नाव आहे. याबाबत प्रवासी वाहतूक करणाऱ्या बसचा चालक प्रविण दत्तात्रय कांबळे (वय ३१, रा. शेळेवाडी, ता. राधानगरी, कोल्हापूर) यांनी आंबेगाव पोलीस ठाण्यात फिर्याद दिली आहे. पोलिसांनी दिलेल्या माहितीनुसार, मुंबईहून प्रवासी वाहतूक करणारी खासगी आराम बस मंगळवारी (२४ फेब्रुवारी) पहाटे साडेतीनच्या सुमारास कोल्हापुरकडे निघाली होती.
मुंबई-बंगळुरु बाह्यवळण मार्गावर दरीपुलाजवळ भरधाव ट्रकने बसला पाठीमागून धडक दिली. अपघातात ट्रक चालक सय्यद गंभीर जखमी झाला. अपघातात ट्रकच्या दर्शनी भागाचे, तसेच बसचे नुकसान झाले. अपघातात बसमधील काही प्रवाशांना दुखापत झाली.
अपघाताची माहिती मिळताच वरिष्ठ पोलीस निरीक्षक शरद झिने यांनी घटनास्थळी भेट दिली. पोलिसांनी अपघातग्रस्त ट्रक क्रेनच्य सहायाने बाजूला नेला. अपघातात गंभीर जखमी झालेला ट्रक चालक सय्यद याला रुग्णालयात दाखल करण्यात आले. उपचारांपूर्वीच त्याचा मृत्यू झाला होता. अपघातात किरकोळ जखमी झालेल्या बसमधील प्रवाशांवर उपचार करण्यात आले. अपघातास जबाबदार ठरल्या प्रकरणी ट्रक चालका विरुद्ध गुन्हा दाखल करण्यात आला. पोलीस उपनिरीक्षक डोईफोडे तपास करत आहेत.
क्रेनचा पट्टा तुटल्याने अपघात; सळई पडून महिलेचा मृत्यू
हडपसर येथील रामटेकडी ओैद्योगिक वसाहतीच्या आवारात लोखंडी जिन्याचे काम करताना क्रेनचा पट्टा तुटल्याने सळई डोक्यात पडून कामगार महिलेचा मृत्यू झाल्याची घटना घडली. अपघातास जबाबदार ठरल्या प्रकरणी वानवडी पोलिसांनी क्रेन चालकासह ठेकेदाराविरुद्ध गुन्हा दाखल केला.
वैशाली मारुती भोसले (वय ४७, रा. गोसावी वस्ती, हडपसर) असे मृत्युमुखी पडलेल्या महिलेचे नाव आहे. याबाबत भोसले यांचा मुलगा चेतन मारुती भोसले (वय २१) याने वानवडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, हडपसर येथील रामटेकडी ओैद्योगिक वसाहतीत एका खासगी कंपनीत वैशाली भोसले काम करत होत्या. कंपनीच्या आवारात मागील बाजूस लोखंडी जिना तयार करण्याचे काम १८ फेब्रुवारी रोजी सकाळी अकराच्या सुमारास सुरू होते. सकाळी अकराच्या सुमारास वैशाली भोसले आणि सहकारी कंपनीच्या आवारातून पिण्याचे पाणी आणण्यासाठी निघाल्या होत्या. क्रेन चालक लोखंडी जिना तयार करण्यासाठी सळई उचलत होता. त्या वेळी अचानक क्रेनचा पट्टा तुटला. पट्टा तुटल्यानंतर क्रेनने उचलेली सळई वैशाली यांच्या डोक्यात पडली. दुर्घटनेत वैशाली गंभीर जखमी झाल्या. त्यांना तातडीने खासगी रुग्णालयात दाखल करण्यात आले. उपचारांपूर्वीच त्यांचा मृत्यू झाल्याचे डाॅक्टरांनी सांगितले.
अपघाताची माहिती मिळताच पोलिसांनी घटनास्थळी भेट दिली. क्रेन चालक, ठेकेदार यांनी पुरेशा सुरक्षाविषयक उपाययोजना न केल्याने दुर्घटना घडल्याचे चौकशीत उघड झाले. त्यानंतर क्रेन चालक, ठेकेदार, तसेच संबधितांविरुद्ध गुन्हा दाखल करण्यात आला. गुन्हे शाखेचे पोलीस निरीक्षक जाधव तपास करत आहेत.
