Pune Book Festival : पुणे पुस्तक महोत्सवात नवा उच्चांक…लाखोंची भेट, कोट्यवधींची पुस्तकविक्री

राष्ट्रीय पुस्तक न्यासतर्फे १३ ते २१ डिसेंबर दरम्यान फर्ग्युसन महाविद्यालयाच्या मैदानावर पुणे पुस्तक महोत्सव झाला. महोत्सवातील उलाढालीसंदर्भातील माहिती मुख्य संयोजक राजेश पांडे यांनी पत्रकार परिषदेत दिली. महोत्सव संयोजन समितीचे सदस्य प्रसेनजित फडणवीस, बागेश्री मंठाळकर, प्रा. संजय चाकणे, डेक्कन एज्युकेशन सोसायटीचे कार्यवाह डॉ. आनंद काटीकर या वेळी उपस्थित होते.

गेल्या वर्षीच्या महोत्सवात साडेसात लाख नागरिकांनी भेट दिली होती, तर सुमारे ४० कोटी रुपयांची विक्री झाली होती. त्यामुळे यंदाच्या महोत्सवाला नागरिकांनी दिलेली भेट, पुस्तक विक्रीचा उच्चांक नोंदवला गेला आहे.

पांडे म्हणाले, ‘महोत्सवाच्या नऊ दिवसांमध्ये सुमारे १२.५ लाख नागरिकांनी भेट दिली. वेगवेगळ्या प्रकाशकांच्या पुस्तकांच्या ३० लाख प्रतींची विक्री झाली. त्यातून सुमारे ५० कोटी रुपयांपेक्षा अधिक उलाढाल झाली. प्रकाशकांकडून रकमेची नेमकी आकडेवारी उपलब्ध झाली नाही. मात्र, पुस्तकांच्या प्रतींच्या विक्रींबाबत माहिती संकलित करण्यात आली. ५०० पुस्तकांचे प्रकाशन महोत्सवात झाले. एक हजारांपेक्षा जास्त साहित्यिकांनी हजेरी लावली. पुणे शहर, पिंपरी-चिंचवड, जिल्ह्यासह राज्यभरातील, परदेशातूनही लोक महोत्सवासाठी आले होते. २०० पेक्षा जास्त ग्रंथालयांनी त्यांची पुस्तकखरेदी महोत्सवात केली. चिल्ड्रन्स कॉर्नरमधील कार्यशाळांमध्ये अनेक शाळांची मुले मोठ्या प्रमाणात सहभागी झाली. तसेच तीन विश्वविक्रमही नोंदवले गेले.’

‘महोत्सवातील पुणे लिट फेस्टच्या कार्यक्रमांनाही भरभरून प्रतिसाद मिळाला. कार्यक्रमही गुणवत्तापूर्ण झाले. अक्षत गुप्ता यांच्यासारख्या लेखकांची पुस्तकावर स्वाक्षरी घेण्यासाठी रांगा लागल्या होत्या. त्यामुळे महोत्सवाला केवळ गर्दीच्या रूपात प्रतिसाद मिळतो असे नाही, तर जाणकार वाचक आवर्जून चर्चात्मक कार्यक्रमांना उपस्थित होते. महोत्सवाअंतर्गत सुमारे १ लाख तरुणांना पुस्तकखरेदीसाठी १०० रुपयांचे सवलत कूपन देण्यात आले, बंकिमचंद्र चटोपाध्याय यांच्या आनंदमठ कादंबरीच्या १ लाख प्रती मोफत वाटण्यात आल्या. महोत्सव आयोजनसाठी सुमारे ४५० हून अधिक स्वयंसेवक, पोलीस, प्रशासन, सावित्रीबाई फुले पुणे विद्यापीठ अशा अनेक घटकांनी योगदान दिले,’ असे पांडे यांनी नमूद केले.

महोत्सवात काही लेखकांच्या पुस्तकांच्या आवृत्त्या संपल्या, वाचक, ग्रंथालयांचा मेळावा असे उपक्रमही झाले. हा प्रतिसाद नक्कीच महत्त्वाचा आहे, असे मंठाळकर यांनी सांगितले.

पुढील वर्षीचे वेळापत्रक जाहीर

पुढील वर्षी होणाऱ्या पुणे पुस्तक महोत्सवाच्या तारखाही जाहीर करण्यात आल्या आहेत. त्यानुसार १२ ते २० डिसेंबर २०२६ या कालावधीत पुणे पुस्तक महोत्सव आयोजित केला जाणार आहे, अशी माहिती पांडे यांनी दिली.