आतेभावाकडून तरुणाचा खून; बिबवेवाडी-कोंढवा रस्त्यावरील घटना, मार्केट यार्ड पोलिसांकडून आरोपीला अटक

रोहन कांतीलाल ओव्हाळ (वय २८, रा. काकडे वस्ती, कोंढवा) असे खून झालेल्या तरुणाचे नाव आहे. या प्रकरणी कौशल लांडगे (वय २०, रा. काळेपडळ, हडपसर) याला अटक करण्यात आली. त्याच्याबरोबर असलेल्या साथीदाराविरुद्ध गु्न्हा दाखल करण्यात आला आहे. याबाबत रोहन ओव्हाळच्या बहिणीने मार्केट यार्ड पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, रोहन ओव्हाळ हा बेरोजगार होता. कौशल लांडगे त्याचा आतेभाऊ आहे. कौशल आणि रोहन यांच्यात भांडणे झाली होती. बिबवेवाडी-कोंढवा रस्त्यावरील अश्विनी पॅरेडाईज सोसायटीजवळून सोमवारी पहाटे पावणेपाचच्या सुमारास रोहन निघाला होता. त्या वेळी आरोपी कौशल आणि त्याच्याबरोबर असलेल्या साथीदाराने रोहनला गाठले. त्याला शिवीगाळ करुन पट्ट्याने मारहाण केली. त्यानंतर त्याच्या डोक्यात रस्त्यात पडलेला सिमेंटचा गट्टू घातला. रोहन गंभीर जखमी झाला. आरोपी तेथून पसार झाले. या घटनेची महिती मिळताच पोलिसांनी घटनास्थळी धाव घेतली. पसार झालेल्या कौशलला अटक करण्यात आली. वरिष्ठ पोलीस निरीक्षक विश्वजित जगताप तपास करत आहेत.

कोरेगाव पार्कात तरूणाचा खुनाचा प्रयत्न

वैमनस्यातून तरुणाच्या गळ्यावर तीक्ष्ण शस्त्राने वार करुन खुनाचा प्रयत्न करण्यात आल्याची घटना कोरेगाव पार्क भागातील संत गाडगे महाराज वसाहतीत घडली. या प्रकरणी एकाविरुद्ध खुनाचा प्रयत्न केल्या प्रकरणी गुन्हा दाखल करण्यात आला आहे.

या प्रकरणी गौरव बबन राजगुरु (वय २७, रा. संत गाडगे महाराज वसाहत, कोरेगाव पार्क) याच्याविरुद्ध गुन्हा दाखल करण्यात आला आहे. सौरभ किशोर गायकवाड (वय २३, रा. संत गाडगे महाराज वसाहत, कोरेगाव पार्क) असे जखमी झालेल्याचे नाव आहे. याबाबत गायकवाड याने कोरेगाव पार्क पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, सौरभ हा ‘डिलिव्हरी बाॅय’ म्हणून काम करतो. आरोपीशी त्याचा वाद झाला होता. शनिवारी (१८ एप्रिल) रात्री साडेअकराच्या सुमारास आरोपीने संत गाडगे महाराज वसाहत परिसरात गायकवाडला अडवून शिवीगाळ केली. त्याच्या गळ्यावर तीक्ष्ण शस्त्राने वार केला. या घटनेत तो गंभीर जखमी झाला. या घटनेनंतर आरोपी पसार झाला. पोलीस उपायुक्त राजलक्ष्मी शिवणकर, सहायक आयुक्त संगीता अल्फान्सो-शिंदे, वरिष्ठ पोलीस निरीक्षक विजयकुमार डोके यांनी घटनास्थळी भेट दिली. पसार झालेल्या आरोपीचा शोध घेण्यात येत असून, पोलीस उपनिरीक्षक संतोष गायकवाड तपास करत आहेत.