‘नॅशनल इन्स्टिट्यूट ऑफ बँकिंग मॅनेजमेंट’ संस्थेत चोरी

पोलिसांनी दिलेल्या माहितीनुसार, कोंढव्यातील एनआयबीएम रस्त्यावर नॅशनल इन्स्टिट्यूट ऑफ बँकिग मॅनेजमेंट ही संस्था आहे. बँकिंग प्रशिक्षणाविषयी या संस्थेचा नावलौकिक आहे. या संस्थेचे आवार प्रशस्त आहे. संस्थेच्या आवारात चोरटे शिरले. चोरट्यांनी संस्थेच्या आवारातील स्टोअर रुमचे कुलूप तोडले. चोरट्यांनी स्टोअर रुममधून एक लाख १९ हजार रुपयांचे साहित्य चोरून नेल्याची घटना घडली. या घटनेची माहिती मिळताच वरिष्ठ पोलीस निरीक्षक कुमार घाडगे यांनी घटनास्थळी भेट दिली. पोलिसांनी संस्थेच्या आवारातील सीसीटीव्ही चित्रीकरण तपासले असून, चोरट्यांचा शोध घेण्यात येत आहे. पोलीस उपनिरीक्षक झाडे तपास करत आहेत.

खासगी विद्यापीठात चोरी प्रकरणी गुन्हा

बालेवाडीतील निकमार युनिव्हर्सिटी या संस्थेतील प्रयोगशाळेतून संगणक आणि लॅपटाॅप असा दीड लाख रुपयांचा मुद्देमाल चोरुन नेल्याची घटना उघडकीस आली. या प्रकरणी एकाविरुद्ध बाणेर पोलिसांनी गुन्हा दाखल केला अहो. याबाबत संस्थेतील कर्मचारी विशाल तळेकर (वय ३७, रा. देशमुखवाडी, शिवणे, वारजे -एनडीए रस्ता) यांनी बाणेर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, बालेवाडी परिसरात निकमार युनिव्हर्सिटी आहे. या संस्थेतील प्रयोगशाळा आणि सर्व्हररुमधील लॅपटाॅप आणि संगणक चोरून नेण्यात आल्याची घटना नुकतीच घडली. संस्थेतील कर्मचाऱ्यांच्या लक्षात हा प्रकार आल्यानंतर त्यांनी पोलिसांकडे तक्रार दिली. पोलीस हवालदार आहेर तपास करत आहेत.

औषध विक्री दुकानातून रोकड चोरी

औषध विक्री दुकानातून रोकड चोरीला गेल्याची घटना कर्वे रस्ता भागात घडली. याप्रकरणी चोरट्यांविरुद्ध गुन्हा दाखल करण्यात आला आहे. याबाबत एका औषध विक्रेत्याने डेक्कन पोलीस ठाण्यात फिर्याद दिली आहे. पोलिसांनी दिलेल्या माहितीनुसार, कर्वे रस्ता परिसरात औषध विक्रीचे दुकान आहे. चोरट्यांनी दुकानातील गल्ल्यातून १६ हजार रुपयांची रोकड चोरुन नेल्याची घटना नुकतीच घडली. पोलीस उपनिरीक्षक पाटील तपास करत आहेत. शहर परिसरात गेल्या काही दिवसांपासून औषध, किराणा माल, तसेच मिठाई विक्री दुकानांचे कुलूप तोडून रोकड चोरीला जाण्याच्या घटना वाढल्या आहेत.