Cyber Crime: ‘डिजिटल ॲरेस्ट’ची भीती दाखवून ज्येष्ठाची १० कोटींची फसवणूक…सायबर पोलिसांकडून सोलापूरातून एकाला अटक

अमर शिवाजी अत्तरगी (रा. मोदीखाना, सोलापूर) असे अटक करण्यात आलेल्याचे नाव आहे. ज्येष्ठ नागरिकाची फसवणूक प्रकरणात यापूर्वी हर्षद सुभाष धनतोले आणि समर्थ सुरेश देशमुख (दोघे रा. कर्वेनगर) यांना अटक करण्यात आली होती. तपासात धनतोलेने एटीएममधून काढलेली रक्कम सांगवीतील एका तरुणाकडे दिली होती. ज्येष्ठ नागरिकाकडे सीबीआयमधील अधिकारी असल्याची बतावणी चोरट्यांनी केली होती. काळ्या पैसे व्यवहारात बँक खात्याचा वापर झाल्याची बतावणी आरोपींनी केली होती. या प्रकरणात डिजिटल ॲरेस्ट करण्यात येणार असल्याची भीती दाखवून सायबर चोरट्यांनी तातडीने बँक खात्यात ज्येष्ठाला रक्कम भरण्यास सांगितले होते. घाबरलेल्या ज्येष्ठ नागरिकाने चोरट्यांच्या खात्यात १० कोटी ७४ लाख रुपये भरले होते.

फसवणूक झाल्याचे लक्षात आल्यानंतर ज्येष्ठाने शिवाजीनगर येथील सायबर पोलीस ठाण्यात फिर्याद दिली होती. ३० जानेवारी ज्येष्ठाकडून घेतलेल्या रक्कमेपैकी ७५ लाख रुपये एका बँक खात्यात जमा करण्यात आल्याची माहिती तपासात मिळाली होती. सांगवीतील तरुणाकडे केलेल्या चौकशीत सोलापूरातील आरोपी अमर अत्तरगी हा या प्रकरणात सामील असल्याचे उघडकीस आले. आरोपींनी एका बँकेच्या खात्यात रक्कम जमा केली होती. या खात्यातील रक्कम धनादेशाद्वारे काढून घेण्यात आली होती. हे खाते अत्तरगी याचे असल्याचे समजल्यानंतर पोलिसांनी त्याचा शोध सुरू केला. सोलापूरातून अत्तरगी याला ताब्यात घेण्यात आले.

सायबर आणि आर्थिक गुन्हे शाखेचे पोलीस उपायुक्त विवेक मासाळ यांच्या मार्गदर्शनाखाली सायबर पोलीस ठाण्याच्या वरिष्ठ पोलीस निरीक्षक स्वप्नाली शिंदे, पोलीस निरीक्षक संगीता देवकाते, उपनिरीक्षक अजित बडे, पोलीस कर्मचारी साळवे, भोसले, राठोड यांनी ही कारवाई केली.