Deep Tech Startup : आगामी काळ भारतातील ‘डीपटेक’ स्टार्ट-अपचा अन् पुण्याकडेही लक्ष!

‘सायन्स अँड टेक्नॉलॉजी पार्क’च्या वतीने ‘इंडिया स्टार्ट-अप डे’निमित्त आयोजित ‘तीन वर्षांत एक कोटी अमेरिकी डॉलरच्या डीपटेक स्टार्टअपच्या उभारणीबाबत मंथन’ या विषयावरील चर्चासत्राचे आयोजन करण्यात आले. त्या वेळी तज्ज्ञांनी ही मते मांडली. या कार्यक्रमाला‘सायन्स अँड टेक्नॉलॉजी पार्क’चे महासंचालक डॉ. राजेंद्र जगदाळे, उद्योजक योगेश पवार, देशपांडे फाउंडेशनचे मुख्याधिकारी विवेक पवार, बौद्धिक स्वामित्व सल्लागार ॲड. राघवेंद्र पोंक्षे, पेंटॅथॉन व्हेंचर्सचे व्यवस्थापकीय भागीदार गिरींद्र कसमळकर, स्टार्टअप मेंटर गुरविंदर सिंग, उद्योजक सत्या बन्सल आदी उपस्थित होते.

‘भारतामध्ये नवउद्यमी कंपन्यांची संख्या मोठ्या प्रमाणात वाढत आहे. सरकारकडूनही त्यांना चांगले प्रोत्साहन मिळत आहे. आगामी काळात भारतामध्ये ‘डीपटेक’ क्षेत्रातील नवउद्यमींमध्ये वाढ होऊ शकते, असे वातावरण आहे. त्याला कल्पक संशोधनाची जोड मिळण्याची आवश्यकता आहे, त्यामुळे या क्षेत्राचा विकास वेगाने होईल. एवढेच नव्हे तर त्यामध्ये नव्या संधी उपलब्ध होऊ शकतात,’ असे मत डॉ. राजेंद्र जगदाळे यांनी व्यक्त केले.

‘नवउद्यमी कंपन्यांची उभारणी करण्यासाठी उत्तम प्रकारची परिसंस्था उभी करण्याकडे अधिक लक्ष देण्याची आवश्यकता आहे. नवउद्यमी कंपनी यशस्वी करण्यासाठी त्यामध्ये नव्या तंत्रज्ञानाचा समावेश असण्याची गरज आहे. असे घडल्यास चांगल्या प्रकारे यश मिळू शकते,’ असे उद्योजक सत्या बन्सल यांनी स्पष्ट केले.

‘नवउद्यमी कंपनी उभी करताना त्यामध्ये यश मिळवण्यासाठी मोठ्या प्रमाणात आत्मविश्वास असण्याची आवश्यकता आहे. पुण्यासारख्या ठिकाणी अनेक संस्था कार्यरत आहेत, त्यांना भेटी देऊन तिथे होत असणाऱ्या नव्या संशोधनाचा वापर कशा प्रकारे करता येऊ शकतो, याचा विचार करून पुढे जाण्याची आवश्यकता आहे,’ असे गिरींद्र कसमळकर यांनी नमूद केले.

‘अपयशाचाही विचार व्हावा’

‘नवउद्यमी कंपनी सुरू करताना आपल्यासमोर अनेक प्रकारची आव्हाने आहेत, याचा विचार आवश्यक आहे. कधी आपल्याला अपेक्षित यश मिळत नाही. योग्य वेळी त्याचे कारण शोधण्याची गरज असते. अपयश आल्यानंतर त्यातून पुढे जात यश मिळवायचे असते, याचा विसर पडता कामा नये. यश मिळवायचे असेल तर आपल्या विचार प्रक्रियेमध्ये खंड पडू देऊ नका,’ असा सल्लाही या वेळी तज्ज्ञांनी दिला.