गणेशोत्सवापूर्वी पुण्यात FDAची धडक कारवाई; बुधवार पेठेत ३८ लाखांचा खवा-पनीर जप्त

पुण्याच्या बाजारपेठेत पहाटेपासूनच कर्नाटक भागातून पनीरचे ट्रक येतात. त्यानंतर शहरातील विविध डेअरी उद्योगांमध्ये ते वितरित केले जातात. मात्र, आज, शुक्रवारी सकाळी साडेसहा वाजल्यापासूनच अन्न व औषध प्रशासनाचे अधिकारी बुधवार पेठ आणि शुक्रवार पेठ परिसरात डेरे दाखल झाले होते. ट्रकमधून आलेला माल दुकानात जाण्याऐवजी अधिकाऱ्यांनी तो ताब्यात घेण्यास सुरुवात केली. या कारवाईत बार्शी येथून पुण्यात आलेला तब्बल ४ हजार ६०० किलो खवा अन्न व औषध प्रशासनाच्या अधिकाऱ्यांनी ताब्यात घेतला असून, तो पूर्णपणे नष्ट करण्याची प्रक्रिया सुरू आहे. या धडक कारवाईत अन्न व औषध प्रशासनाचे १२ ते १३ अधिकारी सक्रिय आहेत. कर्नाटक आणि बार्शी या भागांतून पुण्यात येणाऱ्या खवा आणि पनीरच्या साठ्यांची तपासणी करण्यात येत आहे. संशयित माल ताब्यात घेऊन त्याचे नमुने प्रयोगशाळेकडे तपासणीसाठी पाठविण्यात येणार आहेत.

गणेशोत्सवाच्या काळात खवा, पनीर आणि इतर दुग्धजन्य पदार्थांना मोठी मागणी असते. या पार्श्वभूमीवर, शहरात मोठ्या प्रमाणावर खवा आणि पनीर बाहेरच्या राज्यांतूनही येतो. यापूर्वीही प्रशासनाने पुणे विभागात बनावट खवा आणि पनीरवर मोठी कारवाई केली होती. मात्र, आजच्या कारवाईचे आदेश दहा ते बारा दिवसांपूर्वी अन्न व औषध प्रशासनाच्या मुख्य कार्यालयाकडून म्हणजेच मुंबईकडून काढण्यात आले होते. त्या संदर्भात पुणे अन्न विभाग येथील अन्न व औषध प्रशासन अधिकारी सहायक आयुक्त याविषयीचे तपशील जमा करत होते, अशी माहिती पुणे विभागातील सूत्रांनी दिली.

पुण्याच्या बाजारपेठेत दररोज अंदाजे २० ते २५ टन पनीर कर्नाटकातून येते. गेल्या ४० वर्षांपासून पुण्यातील बाजारात कर्नाटकमधील बागलकोट भागातून पनीर येते. मात्र, गेल्या काही दिवसांपासून अन्न व औषध प्रशासनाने धडक मोहीम उघडल्यामुळे या भागातून येणाऱ्या मालाचे प्रमाण ४० ते ५० टक्क्यांपर्यंत खाली आले आहे, अशी माहिती डेअरी व्यापाऱ्यांनी दिली.

‘मुंबई कार्यालयाकडून याविषयी आदेश प्राप्त झाले होते. त्यानुसार ही कारवाई सुरू आहे. यामध्ये आतापर्यंत साधारणपणे ३८ लाख रुपयांचा माल जप्त करण्यात आला असून, याचे नमुने प्रयोगशाळेकडे तपासणीसाठी देण्यात येणार आहे‌. यानंतर नमुन्यांचा जो अहवाल येईल, त्यानुसार कारवाईचे स्वरूप ठरवले जाणार आहे, अशी माहिती सांगली अन्न व औषध प्रशासन विभागाचे सहायक आयुक्त नीलेश मसारे यांनी दिली.

कारवाईसाठी पोलीस बंदोबस्त

बुधवार आणि शुक्रवार पेठ हा परिसर संवेदनशील असल्याने या भागात स्थानिक पोलीस चौकीतील १५ ते २० पोलीस कर्मचारी बंदोबस्तासाठी ठेवण्यात आले. वरिष्ठ पोलीस उपनिरीक्षक यांच्या आदेशानुसार हा बंदोबस्त ठेवण्यात आला.