पुणे : गणेशोत्सवावेळी भाविकांची गैरसोय टाळण्यासाठी लोकसहभागातून २०० स्वच्छतागृहांची सुविधा उपलब्ध करून दिली जाणार आहे. तसेच गरोदर महिलांना आरामासाठी तीन व्हॅनिटी व्हॅन स्वरूपात हिरकणी कक्ष, पोलीस आणि महापालिका कर्मचाऱ्यांसाठी विनामूल्य भोजन व्यवस्था करण्यात येणार आहे. गणेशोत्सवाचे शेवटचे तीन दिवस आणि अनंत चतुर्दशीला ही व्यवस्था पुणे शहरातील गर्दीच्या ठिकाणी करण्यात येईल.
देशभरातील भाविकांचे पुण्याचा गणेशोत्सव प्रमुख आकर्षण आहे. शहरातील गणेश मंडळांची सजावट, देखावे पाहण्यासाठी अन्य शहरांतून मोठ्या प्रमाणावर नागरिक येत असतात. या कालावधीत शहरातील अपुऱ्या स्वच्छतागृहांमुळे नागरिकांची विशेषत: महिलांची मोठी अडचण होते. त्यामुळे पालकमंत्री, राज्याचे उच्च आणि तंत्रशिक्षण मंत्री चंद्रकांत पाटील यांनी ही सुविधा देण्यासाठी पुढाकार घेतला आहे.
लोकसहभागातून २०० स्वच्छतागृहे, व्हॅनिटी व्हॅनच्या स्वरुपात तीन हिरकणी कक्ष आणि पोलीस तथा मनपा कर्मचाऱ्यांसाठी मोफत जेवणाची व्यवस्था केली आहे. यावेळी गणेशभक्तांची गैरसोय होणार नसून उत्सवाचा आनंद सहज लुटता येईल, असे पाटील यांनी सांगितले.
