शहराला पाणीपुरवठा करणाऱ्या खडकवासला धरणसाखळी प्रकल्पात सुरू असलेला मुसळधार पाऊस सलग पाचव्या दिवशी कायम आहे. गुरुवारी रात्रीपासून शुक्रवारी सकाळपर्यंत चारही धरणांच्या परिसरात मुसळधार पाऊस झाला. गुरुवारी रात्रीपासून शुक्रवारी सकाळपर्यंत टेमघर धरण क्षेत्रात ८१ मिलिमीटर, वरसगाव धरण परिसरात ५५ मि.मी, पानशेत धरण परिसरात ६० मि.मी, तर खडकवासला धरण क्षेत्रात १३ मि.मी पावसाची नोंद झाली आहे. सध्या खडकवासला धरणसाखळी प्रकल्पात ५.४५ अब्ज घनफूट (टीएमसी) म्हणजेच १८.६८ टक्के पाणीसाठा जमा झाला आहे. गुरुवारी रात्री चारही धरणांत ४.९३ टीएमसी पाणीसाठा होता. गुरुवारी रात्रीच्या तुलनेत शुक्रवारी सकाळी ०.५२ टीएमसीने पाणीसाठ्यात वाढ झाली आहे, असे जलसंपदा विभागाकडून सांगण्यात आले.
