बेकायदा पिस्तुल बाळगणाऱ्या सराईतास गुन्हे शाखेच्या खंडणी विरोधी पथकाने वारजे परिसरात पकडले. त्याच्याकडून देशी बनावटीचे पिस्तुल आणि दोन काडतुसे जप्त करण्यात आली. लक्ष्मण येडबा शेंडगे (वय २३, रा. म्हाडा कॉलनी, वारजे) असे अटक करण्यात आलेल्याचे नाव आहे. शेंडगे सराइत असून त्याच्या विरोधात वारजे पोलीस ठाण्यात गंभीर गुन्हे दाखल आहेत. तो वारजे भागाती म्हाडा कॅालनी परिसरात थांबला होता. त्याच्याकडे पिस्तुल असल्याची माहिती खंडणी विरोधी पथकाला मिळाली. त्यानंतर पोलीस निरीक्षक अजय वाघमारे, सहायक निरीक्षक अभिजीत पाटील आणि पथकाने सापळा लावून त्याला पकडले. त्याच्याकडून देशी बनावटीचे एक पिस्तुल आणि दोन काडतुसे जप्त करण्यात आले. शेंडगेची चौकशी करण्यात आली. शेंडगे भाजी विक्रीचा व्यवसाय करत असून चौकशीत त्याने स्वसंरक्षणासाठी बेकायदा पिस्तुल बाळगल्याची माहिती दिली.
