पुणे : पुणे शहराच्या प्रथम नागरिक राहत असलेल्या महापौर बंगल्यातील २० झाडांवर कुऱ्हाड चालविण्यात आल्याचा प्रकार समोर आला आहे. केवळ धोकादायक झालेल्या फांद्या न तोडता अनेक वृक्ष अर्ध्यापर्यंत तोडण्यात आल्याने प्रशासनाच्या कारभारावर प्रश्नचिन्ह उपस्थित केले जात आहे.

झाडे लावा, झाडे जगवा यासाठी राज्य सरकार आणि पुणे महापालिका दरवर्षी लाखो रुपयांचा निधी खर्च करते. तर दुसरीकडे शहराच्या प्रथम नागरिक असलेल्या महापौर यांच्या निवासस्थानातील झाडे अशी नियमबाह्य पद्धतीने तोडली जात असतील तर करायचे काय ? असा सवाल शहरातील वृक्ष प्रेमींकडून उपस्थित केला जात आहे. या प्रकाराबद्दल वृक्षप्रेमींनी नाराजीही व्यक्त केली आहे.

घोले रस्त्यावर पुणे महापालिकेच्या महापौरांचे निवासस्थान आहे. हा बंगला पुणे महापालिकेने बांधला असून बंगल्याच्या आजूबाजूला अनेक झाडे लावण्यात आली आहेत. या झाडांना कीड लागल्याचे कारण पुढे करून महापौर बंगल्यातील २० झाडांची छाटणी करण्यात आली. मात्र, ती कशासाठी, याचे कारण स्पष्ट झाले नसल्याने त्यावर प्रश्नचिन्ह उभे राहिले आहे.

हेही वाचा

नियमानुसार, वृक्ष धोकादायक झाले असतील आणि कोणाच्या जीविताला धोका निर्माण होत असेल, तर अशा झाडांच्या फांद्या ठराविक आकारात कापण्याचे काम महापालिकेकडून केले जाते. झाडे तोडण्याचे कारण, झाडांचे छायाचित्र, त्याचबरोबर वृत्तपत्रामध्ये नोटीस द्यावी लागते. मात्र, महापालिका प्रशासनाने महापौर बंगल्यातील झाडे तोडण्यासाठी काय प्रक्रिया राबविली, याबाबत नेमकी माहिती मिळू शकली नाही.

महापालिकेच्या वृक्ष संवर्धन विभागाचे रवींद्र कांबळे यांनी १२ मार्च रोजी घोले रस्त्यावरील महापौर बंगल्यातील १९ वृक्षांच्या फांद्या छाटण्याचा प्रस्ताव दिला. शिवाजीनगर-घोले रोड क्षेत्रीय कार्यालयाचे सहायक आयुक्त बाळासाहेब ढवळे यांनी दुसऱ्या दिवशी, म्हणजे १३ मार्चला याला मंजुरी दिली.

याबाबत ढवळे म्हणाले, ‘महापौर बंगल्यामधील झाडांच्या फांद्या तोडण्यासाठी परवानगी घेतली आहे. मात्र, दररोज अनेक झाडांची तोडणी करण्यासाठी परवानगी मागितली जाते. या प्रकरणात नक्की कोणी परवानगी मागितली, ती कधी देण्यात आली, याची माहिती घेऊन सांगतो.’

‘महापौर निवासस्थानी राहायला जाण्याच्या अगोदरच येथील झाडे तोडण्यात येत होती. परवानगी घेतली आहे का, याची विचारणा केल्यानंतर सुरुवातीला दोन दिवस काम थांबविण्यात आले होते. झाडे खराब झाल्याचे मला सांगण्यात आले. रीतसर परवानगी असल्याची माहिती प्रशासनाने दिली. झाडांवर उपचार करण्यासाठी ती तोडण्यात आल्याची माहिती प्रशासनाने दिली आहे,’ असे महापौर मंजूषा नागपुरे यांनी स्पष्ट केले.