पुणे : शहरातील सार्वजनिक आरोग्य व्यवस्था अधिक सक्षम, आधुनिक आणि सर्वसामान्यांना परवडणारी करण्यावर भर देत पुणे महानगरपालिकेच्या २०२६-२७ च्या अर्थसंकल्पात “निरोगी पुणे” या संकल्पनेअंतर्गत विविध महत्त्वाकांक्षी उपक्रमांची घोषणा करण्यात आली.
स्थायी समितीचे अध्यक्ष श्रीनाथ भिमाले यांनी मुख्य सभेसमोर सादर केलेल्या या अंदाजपत्रकात आरोग्य सेवांसाठी मोठी तरतूद करण्यात आली असून विद्यमान सुविधांचे सक्षमीकरण आणि नव्या सेवा सुरू करण्यावर विशेष भर देण्यात आला आहे.
महापालिकेचे ५३ बाह्य रुग्ण विभाग, २० प्रसूतिगृहे, ४०० खाटांचे सर्वसाधारण रुग्णालय आणि संसर्गजन्य आजारांचे रुग्णालय कार्यरत आहेत. दररोज सरासरी १२ हजार बाह्यरुग्ण व ३०० आंतररुग्ण उपचार घेत असून दरवर्षी सुमारे ३० लाख नागरिकांना आरोग्य सेवा मिळते. दरवर्षी ८५०० प्रसूती महापालिकेच्या प्रसूतिगृहांमध्ये होतात. या सर्व सेवा विनामूल्य उपलब्ध असून शहरी गरीब औषधे व अंशदायी वैद्यकीय साह्य योजनांसाठी सुमारे १५० कोटी रुपयांची तरतूद करण्यात आली आहे. या पार्श्वभूमीवर कमला नेहरू आणि अण्णासाहेब मगर रुग्णालयांचे आधुनिकीकरण व विस्तार करण्याचा निर्णय घेण्यात आला आहे.
शहरातील आरोग्य सुविधांना बळकटी देण्यासाठी सहा प्रसूतिगृहे आणि पाच रुग्णालये मल्टीस्पेशालिटी रुग्णालयांमध्ये विकसित करण्यात येणार असून आयसीयू, एनआयसीयू आणि अत्याधुनिक नर्सिंग सेवा उपलब्ध करून देण्यात येणार आहेत. वारजे येथे १० हजार चौरस मीटरहून अधिक जागेवर ३५० खाटांचे मल्टीस्पेशालिटी रुग्णालय उभारण्याचे काम प्रगतीपथावर आहे.
कर्करोग उपचारासाठी बाणेर येथे सार्वजनिक-खासगी भागीदारीत महापालिकेचे पहिले कॅन्सर रुग्णालय सुरू होणार असून येथे लिनियर एक्सलेरेटरद्वारे रेडिओथेरपीसारखे उपचार ‘सीजीएचएस’ दरात उपलब्ध होतील. तसेच गंगाधाम परिसरात एमआरआय व सिटी-स्कॅन केंद्र उभारण्यात येणार असून त्यामुळे महागड्या निदान चाचण्या कमी दरात उपलब्ध होतील. या सर्व उपाययोजनांमुळे पुणेकरांना स्वस्त व दर्जेदार आरोग्य सेवा शहरातच उपलब्ध होणार आहेत.
प्रसूतिगृहांमध्ये ‘आयव्हीएफ’ उपचार सेवा
महापालिकेच्या प्रसूतिगृहांमध्ये आयव्हीएफ उपचार सेवा सुरू करण्यात येणार असून वंध्यत्वावरील आधुनिक उपचार गरजू कुटुंबांना परवडणाऱ्या दरात मिळणार आहेत.
कर्करोग, डायलिसिस उपचारांसाठी आर्थिक साह्य मर्यादेत वाढ
कर्करोग आणि मूत्रपिंडाच्या आजारांसाठी डायलिसिस उपचारांवरील आर्थिक सहाय्य मर्यादा ३ लाख रुपयांपर्यंत वाढविण्यात आली आहे. पं. दीनदयाळ उपाध्याय अपघात विमा योजनेची फेररचना करून ती अधिक सक्षमपणे राबविण्यात येणार आहे.
वैद्यकीय महाविद्यालयाचा विस्तार
भारतरत्न अटलबिहारी वाजपेयी वैद्यकीय महाविद्यालयातून यंदा एमबीबीएसची पहिली बॅच बाहेर पडणार असून पदव्युत्तर शिक्षण, जेरियाट्रिक केअर सेंटर, आयव्हीएफ सुविधा आणि दिव्यांग मुलांसाठी विशेष देखभाल युनिट सुरू करण्याचे नियोजन आहे. नायडू रुग्णालय परिसरात विद्यार्थी वसतिगृह व कर्मचारी निवासासाठी १४ मजली इमारत उभारण्यात येणार आहे.
