पुणे-नाशिक महामार्ग प्रकल्पासाठी भूसंपादनाला गती; चाकण औद्योगिक पट्ट्यातील कोंडी सुटणार?

पिंपरी-चिंचवड शहरातील वाढती वाहतूक कोंडी लक्षात घेता पुणे-नाशिक महामार्गाचे रुंदीकरण आणि एलिव्हेटेड कॉरिडॉर हा महत्त्वाकांक्षी प्रकल्प मानला जात आहे. या प्रकल्पामुळे शहरातील वाहतुकीचा वेग वाढण्यासह औद्योगिक आणि आर्थिक विकासालाही चालना मिळणार आहे. बैठकीत प्रकल्पाच्या सद्यस्थितीचा आढावा घेण्यात आला. तसेच, भूसंपादन प्रक्रियेमधील अडचणी, संबंधित विभागांमधील समन्वय आणि नागरिकांच्या प्रलंबित प्रश्नांवर चर्चा करण्यात आली. प्रकल्पाची मुदत लक्षात घेऊन सर्व संबंधित यंत्रणांनी परस्पर समन्वय साधून काम करण्याचे निर्देश देण्यात आले. महापालिका आयुक्त डॉ. विजय सूर्यवंशी, नगर रचना विभागाचे उपसंचालक ललित खोब्रागडे, सहायक संचालक संदेश खडतरे, कनिष्ठ अभियंता संतोष जगदाळे, एनएचआयचे प्रोजेक्ट डायरेक्टर गौतम, सर्व्हेअर प्रशांत माळी तसेच विशेष भूसंपादन अधिकारी उषा विश्वासराव आणि हर्षद घुले उपस्थित होते.

आमदार महेश लांडगे म्हणाले, पुणे-नाशिक महामार्ग आणि एलिव्हेटेड कॉरिडॉर हा भोसरी मतदारसंघासह संपूर्ण पिंपरी-चिंचवडच्या विकासासाठी अत्यंत महत्त्वाचा प्रकल्प आहे. भूसंपादन प्रक्रियेमुळे प्रकल्पाला विलंब होणार नाही, याची संबंधित विभागांनी दक्षता घ्यावी. नागरिकांच्या हिताला प्राधान्य देत सर्व प्रक्रिया पारदर्शक आणि वेळेत पूर्ण कराव्यात.

प्रकल्पाची तांत्रिक वैशिष्ट्ये…

नाशिक फाटा ते खेड (राजगुरूनगर) दरम्यान राष्ट्रीय महामार्ग-६० वर सुमारे ३० किलोमीटर लांबीचा आठ पदरी एलिव्हेटेड कॉरिडॉर प्रस्तावित आहे. या प्रकल्पाची अंदाजित किंमत सुमारे ७ हजार ८२७ कोटी रुपये असून, ‘बांधा, वापरा व हस्तांतरित करा’ (बीओटी) तत्त्वावर विकसित करण्यात येणार आहे. एलिव्हेटेड कॉरिडॉरमुळे भोसरी, मोशी, चाकण आणि औद्योगिक पट्ट्यातील वाहतुकीला अखंड आणि वेगवान मार्ग उपलब्ध होणार आहे. तसेच, विद्यमान महामार्गाचे चार ते सहा पदरी रुंदीकरण, दोन्ही बाजूंना सेवा रस्ते आणि वाहतूक सुरक्षिततेसाठी आवश्यक सुविधा उभारण्यात येणार आहेत.

पुणे-नाशिक महामार्ग रुंदीकरण आणि एलिव्हेटेड कॉरिडॉर हा केवळ पायाभूत सुविधा प्रकल्प नसून, पिंपरी-चिंचवडच्या भविष्यातील विकासाचा महामार्ग आहे. वाढती लोकसंख्या आणि वाहतूक कोंडी लक्षात घेता हा प्रकल्प अत्यंत आवश्यक आहे. भूसंपादन प्रक्रियेमुळे कामात कोणताही विलंब होऊ नये, यासाठी प्रशासनाने समन्वयाने काम करावे. नागरिकांच्या हिताचे संरक्षण करत पारदर्शक आणि वेळबद्ध पद्धतीने सर्व प्रक्रिया पूर्ण करण्याचे निर्देश संबंधित अधिकाऱ्यांना देण्यात आले आहेत. मुख्यमंत्री देवेंद्र फडणवीस यांच्या मार्गदर्शनाखाली हा प्रकल्प पूर्ण करण्यासाठी आम्ही पाठपुरावा करीत आहोत. या प्रकल्पामुळे भोसरीसह संपूर्ण पिंपरी-चिंचवडच्या वाहतूक व्यवस्थेला नवी दिशा मिळेल आणि उद्योग, व्यापार तसेच रोजगाराच्या संधींनाही मोठी चालना मिळेल, असे आमदार महेश लांडगे म्हणाले.