पुणे : दिवंगत उपमुख्यमंत्री अजित पवार यांच्या जयंतीनिमित्त आयोजित करण्यात आलेल्या स्वच्छता सप्ताहामध्ये उत्कृष्ट कामगिरी करणाऱ्या पुणे महापालिकेच्या तीन क्षेत्रीय कार्यालयांना एकूण ९० लाख रुपयांची रोख बक्षिसे दिली जाणार आहेत. स्वच्छतेमध्ये उत्कृष्ट कामगिरी करणाऱ्या क्षेत्रीय कार्यालयांना अनुक्रमे ५०, २५ आणि १५ लाख रुपयांची बक्षिसे देण्याचा प्रस्ताव महापालिका प्रशासनाने तयार करून तो मंजुरीसाठी स्थायी समितीसमोर ठेवला होता. त्याला मान्यता देण्यात आल्याचे समितीचे अध्यक्ष श्रीनाथ भिमाले यांनी पत्रकार परिषदेत सांगितले.
या स्पर्धेसाठी क्षेत्रीय कार्यालयांच्या कामगिरीचे मूल्यांकन त्रयस्थ संस्थेमार्फत केले जाणार असून प्रथम, द्वितीय आणि तृतीय क्रमांक निवडले जाणार आहेत. दिवंगत उपमुख्यमंत्री अजित पवार यांच्या जयंतीनिमित्त शहरात २२ ते २८ जुलैदरम्यान स्वच्छता सप्ताह राबविण्यात आला. त्यानंतर ५ ऑगस्टपर्यंत विविध स्वच्छता उपक्रम सुरू ठेवण्यात आले आहेत. क्षेत्रीय कार्यालयांना काम करताना स्पर्धा निर्माण व्हावी तसेच अधिक चांगल्या प्रकारे शहरात स्वच्छता होण्यास मदत व्हावी, यासाठी स्पर्धा घेत बक्षिसे दिली जाणार आहेत.
या स्पर्धेसाठी सार्वजनिक रस्ते, बसस्थानके, रेल्वे स्थानके, रिक्षा स्टँड, विमानतळ परिसरातील स्वच्छता, शाळांमधील डीप क्लीन ड्राइव्ह, मंडई आणि बाजारपेठांची स्वच्छता, नदी-नाले व तलाव परिसराची स्वच्छता, झोपडपट्ट्या आणि वस्त्यांमधील स्वच्छता, आरआरआर केंद्रांवरील ई-कचरा व प्लास्टिक संकलन, सार्वजनिक शौचालयांची स्वच्छता, क्रॉनिक स्पॉटचे सुशोभीकरण, दंडात्मक कारवाईचे प्रमाण आणि नावीन्यपूर्ण उपक्रम अशा दहा निकषांवर प्रत्येकी दहा गुण देण्यात येणार आहेत.
या निकषांवर एकूण १०० गुणांचे मूल्यांकन होईल. मूल्यांकन पूर्ण झाल्यानंतर प्रथम क्रमांकाच्या क्षेत्रीय कार्यालयाला ५० लाख, द्वितीय क्रमांकाला २५ लाख आणि तृतीय क्रमांकाला १५ लाख रुपयांचे पारितोषिक देण्यात येणार आहे. यासाठी एकूण ९० लाख रुपयांचा खर्च अपेक्षित असून, सन २०२६-२७ च्या अर्थसंकल्पातील ‘सॅनिटेशन कमिटी व जनजागृती मोहीम’ या अर्थशीर्षकातून हा खर्च करण्यात येणार आहे. या अर्थशीर्षकाखाली १३ कोटी रुपयांची तरतूद उपलब्ध असल्याचे प्रशासनाने प्रस्तावात नमूद केले आहे.
काय आहेत स्वच्छता स्पर्धेचे निकष ?
- सार्वजनिक रस्ते व वाहतूक केंद्रांची स्वच्छता
- शाळांमधील ‘डीप क्लीन ड्राइव्ह’ व जनजागृती
- मंडई, बाजारपेठा व शासकीय इमारतींची स्वच्छता
- नदी, नाले, तलाव आदी जलस्रोतांची स्वच्छता
- झोपडपट्ट्या व वस्त्यांमधील स्वच्छता
- आरआरआर केंद्रांवर ई-कचरा व प्लास्टिक संकलन
- सार्वजनिक शौचालयांची स्वच्छता व देखभाल
- क्रॉनिक स्पॉटचे सुशोभीकरण
- दंडात्मक कारवाईचे प्रमाण
- नावीन्यपूर्ण स्वच्छता उपक्रम
अशी असणार बक्षिसांची रक्कम
- प्रथम : ५० लाख रुपये
- द्वितीय : २५ लाख रुपये
- तृतीय : १५ लाख रुपये
- एकूण पारितोषिक निधी : ९० लाख रुपये
