२८ लाखांची लाच प्रकरणात महिला पोलीस अधिकारी निलंबित; पोलीस आयुक्त अमितेशकुमार यांचे आदेश

तोटेवार यांना कार्यमुक्त करण्याचा आदेश रद्द करण्यात आला असून, सहायक पोलीस निरीक्षक पदावरुन त्यांना निलंबित करण्यात येणार आहे, अश माहिती आर्थिक गुन्हे शाखेतील पोलीस उपायुक्त विवेक मासाळ यांनी दिली. तोटेवार या आर्थिक गुन्हे शाखेत नियुक्तीस होत्या. जमिनीच्या एका प्रकणातील तक्रार अर्ज त्यांच्याकडे चौकशीसाठी सोपविण्यात आला होता. या प्रकरणात तोटेवार यांनी तक्रारदाराकडे ३० लाख रुपयांची लाच मागितली होती. तक्रारदाराने सुरुवातीला दोन लाख रुपये दिले होते. उर्वरित २८ लाख रुपयांची लाच देण्याची मागणी त्यांनी केली होती.

लाचेची रक्कम घेऊन तक्रारदाराला शनिवारी (२ मे) दुपारी बंडगार्डन रस्त्यावरील एका पंचतारांकित हाॅटेलजवळ बोलाविले होते. ही रक्कम स्वीकारण्यासाठी तोटेवार यांनी संभाजी शिवाजी चव्हाण (वय ४७, रा. चिमण्या गणपती चौक, सदाशिव पेठ ) यांना पाठविले होते. चव्हाण हा तोटेवार यांच्या ओळखीचा आहे. तक्रारदाराकडून लाच घेताना चव्हाणला लाचलुचपत प्रतिबंधक विभागाने सापळा लावून पकडले. चौकशीत तोटेवार यांनी लाच घेण्यासाठी पाठविल्याचे उघड झाल्यानंतर तोटेवार यांच्यासह चव्हाण याला अटक करण्यात आली. तोेटेवार आणि चव्हाण यांना न्यायालायने सहा मेपर्यंत पोलीस कोठडीत ठेवण्याचे आदेश दिले.

खुनाचा प्रयत्न करुन पसार झालेला सराईत गजाआड

खुनाचा प्रयत्न करुन पसार झालेल्या सराइताला येवलेवाडी पोलिसांनी अटक केली. सराइताकडून देशी बनावटीचे पिस्तूल, काडतूस जप्त करण्यात आले.

राहुल सुनील कुचेकर (वय २५, रा. जय शंकर बिल्डिंग, बिबवेवाडी) असे अटक करण्यात आलेल्याचे नाव आहे. कुचेकर याने सिंहगड रस्ता परिसरात एकाचा खुनाचा प्रयत्न केला होता. या प्रकरणात त्याच्याविरुद्ध हवेली पोलीस ठाण्यात गुन्हा दाखल करण्यात आला होता. गुन्हा दाखल झाल्यानंतर कुचेकर पसार झाला होता. तो कोंढवा परिसरातील येवलेवाडी भागात येणार असल्याची माहिती तपास पथकातील पोलीस कर्मचारी अभिजित जाधव आणि विजय खेंगरे यांना मिळाली. त्यानंतर येवलेवाडीतील पानसरेनगर भागात सापळा लावून त्याला पकडले. त्याची झडती घेण्यात आली. त्याच्याकडे देशी बनावटीचे पिस्तूल आणि काडतूस सापडले. कुचेकर याच्याविरुद्ध यापूर्वी कोंढवा, बिबवेवाडी, हवेली, भारती विद्यापीठ पोलीस ठाण्यात गंभीर स्वरुपाचे पाच गुन्हे दाखल आहेत.

परिमंडळ पाचच्या पोलीस उपायुक्त राजलक्ष्मी शिवणकर, सहायक आयुक्त नम्रता देसाई यांच्या मार्गदर्शनाखाली वरिष्ठ पोलीस निरीक्षक मारुती पाटील, गुन्हे शाखेचे पोलीस निरीक्षक दीपक कारंडे, सहायक निरीक्षक स्वप्नील नेवसे, अरुण किटे, अभिजित जाधव, अभिजित रत्नपारखी, गणेश चिंचकर, लक्ष्मण होळकर, विजय खेंगरे, अनिल बनकर, मयूर मोरे, अक्षय शेंडगे यांनी ही कारवाई केली.