ध्वनिवर्धकांच्या नव्हे, गरजूंसाठी धान्याच्या भिंती उभारण्याचा आदर्श; शुक्रवार पेठेतील सेवा मित्र मंडळाचा उपक्रम

सेवा मित्र मंडळ येथे झालेल्या कार्यक्रमास आमदार हेमंत रासने, नगरसेवक राघवेंद्र मानकर, सौरभ वीरकर, वरिष्ठ पोलीस निरीक्षक धनंजय पिंगळे, गणेश अवघडे, सामाजिक कार्यकर्ते आनंद सराफ, उमेश कांबळे, अशोक मेहेंदळे, शिरीष शिंदे, किरण सोनीवाल, अमित जाधव, अनिकेत मारणे, मंडळाचे अध्यक्ष राजाभाऊ महाडिक, शिरीष मोहिते, अमर लांडे, नमन कांबळे, विक्रांत मोहिते यांच्यासह  कार्यकर्ते उपस्थित होते. मंडळाच्या वतीने पुरुष सदस्य नसलेल्या तसेच निराधार कुटुंबांना या उपक्रमातून मदत करण्यात येत आहे. यामध्ये मुस्लिम कुटुंबांसह रोजगारासाठी पुण्यात आलेल्या नेपाळी कुटुंबांचाही समावेश आहे.

रासने म्हणाले, ‘सेवा मित्र मंडळाने ध्वनिवर्धकांच्या भिंतींऐवजी गरजू कुटुंबांसाठी धान्याच्या भिंती उभारून समाजाप्रती असलेली बांधिलकी जपली आहे. गरजूंसाठी अशा पद्धतीने मदतीचा हात पुढे करणे हे मंडळाचे कार्य कौतुकास्पद आहे. ३६५ दिवस समाजाला काही तरी देणे लागतो, या भावनेने काम करणारे कार्यकर्ते हीच गणेशोत्सवाची खरी ताकद आहे. १३४ वर्षांची परंपरा असलेल्या या उत्सवाने अनेक समर्पित कार्यकर्ते घडविले असून, उत्सवाला दिशा देण्याचे काम त्यांनी केले आहे. एक दिवसाच्या विसर्जन मिरवणुकीमुळे वर्षभर हा उत्सव समाजाला कशा प्रकारे मदत करतो हे विसरता कामा नये.  विसर्जन मिरवणुकीसह उत्सवातील सर्व उपक्रमांमध्ये कायद्याचे पालन केले पाहिजे. गणेशोत्सव ही केवळ उत्सवाची परंपरा नसून एक चळवळ आहे आणि या चळवळीने संघटित शक्ती निर्माण केली आहे. या शक्तीचा उपयोग समाजासाठी करण्याची जबाबदारी कार्यकर्त्यांची आहे.’

मोहिते म्हणाले, ‘सण-उत्सव साजरे करताना समाजातील उपेक्षित घटकांकडे मंडळाच्या वतीने आवर्जून लक्ष दिले जाते. उत्सव ताकदीने साजरा व्हावा, मात्र त्याचबरोबर त्यातून समाजोपयोगी संदेशही गेला पाहिजे. समाजातील गरजू कुटुंबांनाही सण आनंदाने साजरा करता यावा, हा या उपक्रमामागचा उद्देश आहे. गणेशोत्सव हा कोण्या एका धर्माचा उत्सव नसून त्यात मुस्लिम समाजासह विविध समाजघटकांचेही योगदान राहिले आहे. त्यामुळे हा उत्सव समाजाला जोडणारा आणि एकमेकांना आधार देणारा ठरला पाहिजे.’