‘पेशवे पुतळा अनावरण कार्यक्रमावर बहिष्कार’ मस्तानी यांच्या वंशजांचा डावलल्याचा आरोप

‘सध्याचे बाजीराव पेशव्यांचे पुण्यातील वंशज रघुनाथ राव हे वाराणसी येथून भासकुटे परिवाराकडून दत्तक घेतले गेले आहेत. त्यामुळे आपणच बाजीराव पेशव्यांचे खरे वंशज आहोत. माझ्या पूर्वजांच्या बलिदानाचा गौरवशाली इतिहास आहे. माझे पूर्वज समशेर बहादूर यांनी पानिपतच्या तिसऱ्या युद्धात मराठ्यांचे प्रतिनिधित्व केले. वयाच्या २७ व्या वर्षी त्यांचे निधन झाले. माझे पणजोबा नवाब अली बहादूर यांनी १८५७ मध्ये झाशीची राणी लक्ष्मीबाई यांना साथ देत स्वातंत्र्यसंग्रामात सहभाग घेतला होता,’ असा दावा नवाब शदाब अली बहादूर यांनी पत्रकात केला आहे.

‘थोरले बाजीराव पेशवा प्रतिष्ठान समितीचे कुंदनकुमार साठे आणि सहकाऱ्यांनी या इतिहासाकडे दुर्लक्ष केले. दत्तक वंशजांना मानाचे स्थान देत, व्यासपीठावर स्थान दिले आहे. या कार्यक्रमांचे आमंत्रण दोन दिवसांपूर्वी देण्यात आले असून, आपल्याला व्यासपीठावर बसवता येणार नाही, असे सांगितले आहे. या माध्यमातून ऐतिहासिक सत्य दडपण्याचा आणि अमित शहा यांना भरकटविण्याचा प्रयत्न केला जात आहे,’ असा आरोप त्यांनी केला आहे.

राष्ट्रीय संरक्षण प्रबोधिनीतील विद्यार्थ्यांना प्रेरणा देण्यासाठी थोरले बाजीराव पेशवे यांचा अश्वारूढ पुतळा साकारण्यात आला आहे. त्याचा मस्तीनीच्या वंशजांशी संबंध नाही. कोणत्या उद्देशातून त्यांनी आरोप केले हे त्यांनाच माहीत असावे.कुंदनकुमार साठे सचिव, थोरले बाजीराव पेशवा प्रतिष्ठान समिती