पुरेसा पाणीसाठा, तरीही काटकसर आवश्यक; जलसंपदा विभागाचे आवाहन

‘गेल्या वर्षी याच दिवशी (१३ एप्रिल) चारही धरणांत मिळून ११.४० टीएमसी पाणीसाठा होता. यंदा हा पाणीसाठा तुलनेत जास्त असला तरी, पाणी काटकसरीने वापरण्याची आवश्यकता आहे,’ असे खडकवासला पाटबंधारे विभागाचे कार्यकारी अभियंता किरण देशमुख यांनी सांगितले. यंदा पाऊस कमी होण्याची शक्यता असल्यामुळे जलसंपदा विभागाने पुणे आणि पिंपरी-चिंचवड महापालिका तसेच लगतच्या औद्योगिक क्षेत्रांनी १५ टक्के पाणीकपात करावी, असे पत्र दिले आहे.

पाऊस कमी होण्याची शक्यता लक्षात घेऊन जलसंपदामंत्री राधाकृष्ण विखे-पाटील यांनीही महापालिकांनी पाणी जपून वापरावे, असे आवाहन केले आहे. खडकवासला, पानशेत, वरसगाव आणि टेमघर या चार धरणातून शहराला पाणीपुरवठा केला जातो. शहराची तहान भागविण्यासाठी महापालिका प्रतिदिन १ हजार ५६० दशलक्ष लिटर पाणी धरणातून घेते.

पुण्यात सध्या दररोज सुमारे १५६० दशलक्ष लिटर पाण्याचा वापर होत असून, तो दरमहा अंदाजे १.६५ टीएमसी आहे. हा पाणीवापर १२०० ते १३०० दशलक्ष लिटरपर्यंत मर्यादित ठेवणे अपेक्षित असून मासिक वापर सुमारे १.३ टीएमसीपर्यंत आणण्याचे उद्दिष्ट आहे. त्यानुसार पुढील चार महिन्यांत दोन टीएमसी पाणीबचत करता येऊ शकते, असा दावाही जलसंपदा विभागाच्या अधिकाऱ्यांनी केला आहे.