पुरंदरचा वीज प्रश्न सुटणार! ‘महापारेषण’ला कोडीत खुर्द येथे फक्त १ रुपयात ३० वर्षांसाठी जागा

पायाभूत विकास आराखड्यानुसार, महाराष्ट्र स्टेट इलेक्ट्रीसिटी ट्रान्समिशन कंपनी अंतर्गत (महापारेषण) ‘सासवड ट्रान्समिशन लिमिटेड’ हे उपकेंद्र उभारणार आहे. यासाठी कोडीत खुर्द येथील गट नंबर १७७ मधील एकूण ४६ हेक्टर ४७ आर क्षेत्रापैकी १० हेक्टर २२ आर (सुमारे २५ एकर) जमीन फक्त १ रुपया या नाममात्र दराने पुढील ३० वर्षांच्या कालावधीसाठी भाडेपट्ट्याने मंजूर करण्यात आली आहे.

हा मोठा प्रकल्प उभारताना स्थानिक नागरिक आणि पर्यावरणाचा विचार करून शासनाने काही अटी आणि शर्तीदेखील घातल्या आहेत. या संपूर्ण परिसरात नियमानुसार आवश्यक तितकी झाडे लावून निसर्गाचा समतोल राखणे वीज कंपनीला बंधनकारक करण्यात आले आहे. त्याची तपासणी जिल्हाधिकाऱ्यांनी करावी, असेही महसूल विभागाने नमूद केले आहे. या उपकेंद्रामुळे शेजारील शेतकऱ्यांना किंवा त्यांच्या वहिवाटीच्या रस्त्याला कोणताही त्रास होणार नाही, याची काळजी घ्यावी लागणार आहे.