Ranjangaon Mahaganpati Temple Closed: भाविकांसाठी महत्त्वाची बातमी! रांजणगाव महागणपती मंदिर ‘या’ तारखेपर्यंत बंद; अष्टविनायक आराखड्याचे काम सुरू

गेल्या तीन महिन्यांपासून मंदिरातील मुख्य रचना तसेच परिसरातील जतन, दुरुस्ती आणि संवर्धनाची कामे प्रगतिपथावर आहेत. या पार्श्वभूमीवर देवस्थान समितीने मंदिर तात्पुरते बंद ठेवण्याचा ठराव घेतला असून, सहाय्यक धर्मादाय आयुक्त, पुणे विभाग यांनीही त्यास मान्यता देत संबंधित आदेश जारी केले आहेत.

या कालावधीत मंदिर दर्शनासाठी बंद असले, तरी श्री महागणपती यांची नित्य पूजाअर्चा, अभिषेक आणि अन्य धार्मिक विधी नियमानुसार सुरू राहणार आहेत. भाविकांना मंदिर परिसरात प्रवेश किंवा प्रत्यक्ष दर्शनाची सुविधा उपलब्ध राहणार नाही. तसेच, बांधकाम यंत्रणा, अधिकृत अधिकारी-कर्मचारी आणि विश्वस्त यांच्याशिवाय अन्य कोणालाही मंदिर परिसरात प्रवेश दिला जाणार नाही, असे या आदेशात नमूद करण्यात आले आहे.

श्री महागणपती मंदिर, रांजणगाव येथील विकासकामे ही दीर्घकालीन सुरक्षितता, सुविधा आणि भाविकांच्या सोयीसाठी आवश्यक असल्याने ही कामे नियोजनबद्ध तसेच वेळेत पूर्ण व्हावीत, यासाठी मंदिर तात्पुरते बंद ठेवण्यात येत आहे. त्यामुळे भाविकांनी व स्थानिक नागरिकांनी प्रशासनास सहकार्य करावे, असे आवाहन पुरातत्त्व विभागाचे सहायक संचालक तसेच रांजणगाव देवस्थानच्या विश्वस्तांनी केले आहे.