Professor Recruitment : प्राध्यापक भरतीमध्ये अनेक उमेदवार अपात्र? नेमके कारण काय?

राज्य शासनाने राज्यातील विविध विद्यापीठांतील रिक्त जागा भरण्यासाठी मान्यता दिली. मात्र, प्राध्यापक भरतीचे सूत्र दोन वेळा बदलण्यात आले. आधी शैक्षणिक पात्रतेसाठी ८० गुण, मुलाखतीसाठी २० गुण असे सूत्र निश्चित करण्यात आले होते. त्यानंतर या सूत्रातील अनेक त्रुटी दाखवून देण्यात आल्यानंतर त्यात बदल करून शैक्षणिक पात्रतेसाठी ७५, मुलाखतीसाठी २५ गुण निश्चित करण्यात आले.

मात्र, त्यातही त्रुटी असल्याने पुन्हा बदल करून शैक्षणिक, संशोधन कामगिरीसाठी ६०, अध्यापन कौशल्यासाठी २०, मुलाखतीसाठी २० गुण असे सूत्र अंतिम करून भरती करण्यास मान्यता देण्यात आली. त्यानंतर पात्रताधारक उमेदवारांना ‘एटीआर’ (शैक्षणिक, अध्यापन, संशोधन) तपशील त्यांच्या अर्जात भरण्याबाबतच्या सूचना देण्यात आल्या होत्या. प्राध्यापक भरतीची प्रक्रिया विद्यापीठ अनुदान आयोगाच्या (यूजीसी) नियमावलीनुसार राबवण्याची मागणी उच्च शिक्षण क्षेत्रातील तज्ज्ञांसह विविध संघटनांनी केली होती. मात्र, आता ६०ः२०ः२० या सूत्रानुसार भरती प्रक्रिया राबवली जाणार असल्याचे दिसून येत आहे.

सावित्रीबाई फुले पुणे विद्यापीठातील १११ रिक्त जागांसाठी सुमारे ९ हजार अर्ज दाखल झाले आहेत. मात्र, सुधारित निर्णयानुसार अनेक उमेदवारांनी त्यांचा ‘एटीआर’ तपशील अर्जात नमूद केला नसल्याचे आता निदर्शनास आले आहे. त्यामुळे एटीआर न भरलेले उमेदवार भरती प्रक्रियेतून अपात्र ठरण्याची शक्यता निर्माण झाली आहे. उच्च व तंत्रशिक्षणमंत्री चंद्रकांत पाटील यांनी विद्यापीठांना प्राध्यापक भरती प्रक्रिया पूर्ण करण्यासाठी जूनपर्यंतची मुदत दिली आहे. त्यामुळे आता अर्जांची छाननी, मुलाखती अशी प्रक्रिया राबवण्यासाठी विद्यापीठांना धावपळ करावी लागणार असल्याचे चित्र आहे.

धारित शासन निर्णयाप्रमाणे ६० गुणांचा ‘एटीआर’ ज्या मूळ उमेदवारांनी सादर केलेला नाही, ते अपात्र ठरण्याची शक्यता असून, भरतीप्रक्रियेला विलंब होऊ न देता या उमेदवारांनाही संधी देता येईल का, याचा विद्यापीठाकडून विचार सुरू आहे. – डॉ. प्रफुल्ल पवार, प्रभारी कुलसचिव, सावित्रीबाई फुले पुणे विद्यापीठ