तळेगाव-चाकण-शिक्रापूर मार्गावर ४० किलोमीटरमधील दुरुस्ती दोन दिवसांत… वाहतुकीचे नियोजन कसे असणार?

तळेगाव-चाकण-शिक्रापूर मार्गाची एकूण लांबी ५४ किलोमीटर आहे. त्यापैकी तसेच एमआयडीसी पट्ट्यातील सुमारे १४ किलोमीटर रस्त्याची अधिक दुरवस्था झाल्याने या भागातील खड्डे बुजविणे, अन्य दुरुस्तीची कामे पुढील चार दिवसांत पूर्ण करण्याचे निर्देश देण्यात आले आहेत. वाहतुकीची वाढती गरज लक्षात घेऊन या मार्गावरील सुमारे १२ किलोमीटर लांबीच्या रस्त्याचे रुंदीकरण पुढील दोन महिन्यांत पूर्ण करण्यात येणार आहे.

गेल्या वर्षीचा अनुभव लक्षात घेऊन तसेच रस्त्याची तातडीची दुरुस्ती आवश्यक असल्याने या मार्गावरील दुरुस्तीचे काम एका वर्षासाठी राष्ट्रीय महामार्ग प्राधिकरणाऐवजी राज्य शासनाच्या सार्वजनिक बांधकाम विभागामार्फत करण्याचा निर्णय घेण्यात आला होता. त्यासाठी तत्कालीन उपमुख्यमंत्री तथा पालकमंत्री अजितदादा पवार आणि सार्वजनिक बांधकाम मंत्री शिवेंद्रसिंहराजे भोसले यांनी विशेष लक्ष देऊन ५४ किलोमीटर रस्त्याच्या दुरुस्ती तसेच काही भागातील रुंदीकरणासाठी ५९ कोटी रुपयांचा निधी मंजूर केला होता. त्यानुसार सार्वजनिक बांधकाम विभागाने जानेवारी २०२६ मध्ये कार्यारंभ आदेश देऊन काही भागात काम सुरू केले होते. मात्र, रस्त्यालगतच्या विविध सेवा वाहिन्यांमुळे निर्माण झालेले अडथळे तसेच युद्धजन्य परिस्थितीमुळे डांबर उपलब्ध होण्यात आलेल्या अडचणींमुळे कामाला अपेक्षित गती देता आली नाही. पावसाळ्यात रस्त्याची झालेली दुरवस्था लक्षात घेऊन आता दुरुस्तीच्या कामाला गती देण्यात आली आहे.

रस्त्याची दर्जोन्नती

रस्त्याच्या कामाचा मंत्री शिवेंद्रसिंहराजे भोसले यांच्याकडून वेळोवेळी आढावा घेण्यात येत आहे. स्त्याची दुरुस्तीची कामे निर्धारित कालमर्यादेत पूर्ण करण्याच्या सूचना संबंधित यंत्रणांना देण्यात आल्या आहेत. या मार्गाच्या कायमस्वरूपी दर्जोन्नतीसाठी महाराष्ट्र राज्य पायाभूत सुविधा विकास महामंडळामार्फत काम हाती घेण्यात येणार असून, पुढील तीन महिन्यांत या कामाला सुरुवात करण्यात येणार आहे. या दर्जोन्नतीमुळे मार्गाची वाहतूक क्षमता वाढण्यास तसेच भविष्यातील वाहतूक कोंडी आणि रस्त्याच्या दुरवस्थेचा प्रश्न कायमस्वरूपी सोडविण्यास मदत होणार आहे.