महापालिका आयुक्तच पुण्यातील समस्यांचा पाढा जाहीरपणे वाचून दाखवतात तेव्हा…

‘पुण्यातील अनेक ठिकाणी कचरा साचलेला दिसतो. महापालिकेचे कर्मचारी सकाळी कचरा उचलतात आणि काही तासांत नागरिक तिथे पुन्हा कचरा टाकतात. कचरा न करणे ही प्रत्येक नागरिकाची जबाबदारी आहे. त्यामुळे ‘स्वच्छ भारत’ अभियानाच्या धर्तीवर पुण्यासाठी विशेष अभियान राबविले जाणार आहे. त्यात लोकसहभागावर भर दिला जाईल. या माध्यमातून नागरिकांच्या वर्तनात सुधारणा करण्यावर लक्ष केंद्रित केले जाईल. पुढील सहा महिन्यांत शहरात सगळीकडे स्वच्छता दिसेल, अशा पद्धतीने काम करण्यात येईल,’ असे त्यांनी सांगितले.

‘शहरातील ३० टक्के भागात पाणीपुरवठ्याची समस्या आहे. शहराची लोकसंख्या वाढत असताना जलसंपदा विभागाकडून मिळणारा पाणी कोटा अपुरा पडत आहे. शहरात दीड लाख ते दोन लाख नळजोड बेकायदा आहेत. याचबरोबर पाणीगळती आणि चुकीचे पाणीवाटप या गोष्टीही पाणीपुरवठ्यात अडसर ठरत आहेत. त्यामुळे याबाबत उपाययोजना करून पाणीपुरवठ्याची समस्या सोडविण्यासाठी पावले उचलली जातील,’ असे आयुक्तांनी नमूद केले.

सर्वप्रथम नवीन आजार पुण्यात का?

‘देशात कोणताही नवीन आजार आला, की त्याचे रुग्ण पहिल्यांदा पुण्यात आढळतात. काही दिवसांपूर्वी शहरात गुईलेन बॅरे सिंड्रोम (जीबीएस) या गंभीर विकाराचे रुग्ण मोठ्या प्रमाणात आढळून आले होते. प्रत्येक नवीन रोगांचे रुग्ण पुण्यात सर्वप्रथम आढळून येत असल्याने याबाबत कायमस्वरूपी उपाययोजना करण्याची आवश्यकता आहे,’ असेही आयुक्त नवल किशोर राम यांनी स्पष्ट केले.