पुणे : देवदर्शनासाठी निघालेल्या कुटुंबाला कोयत्याचा धाक दाखवून लूटमार, तसेच युवतीवर अत्याचार करून पसार झालेल्या आरोपींना ग्रामीण पोलिसांनी अटक केली. पुणे-सोलापूर महामार्गावरील दौंड परिसरात ही घटना घडली होती. याप्रकरणी अमिर सलीम पठाण (वय ३०, रा. अकलूज, जि. सोलापूर), विकास नामदेव सातपुते (वय २८, रा. भिगवण, जि. पुणे) यांना अटक करण्यात आली. पुणे-सोलापूर महामार्गावरील स्वामी चिंचोली गावाजवळ ३० जून रोजी पहाटे ही घटना घडली होती. देवदर्शनासाठी निघालेले कुटुंब पहाटे स्वामी चिंचोली गावाजवळील उपाहारगृहाच्या परिसरात थांबले होते. त्या वेळी दुचाकीवरून आलेल्या चोरट्यांनी कोयत्याच्या धाकाने एका महिलेचे दागिने हिसकावून घेतले, तर युवतीवर अत्याचार केले. तिने आरडाओरडा केल्यानंतर आरोपी पसार झाले. घाबरलेल्या कुटुंबाने दौंड पोलीस ठाण्यात धाव घेऊन तक्रार दिली.
पोलीस अधीक्षक संदीपसिंग गिल, अतिरिक्त अधीक्षक गणेश बिरादार, दौंडचे उपविभागीय अधिकारी बापूराव दडस यांच्या मार्गदर्शनाखाली भिगवण, दौंड तसेच स्थानिक गुन्हे शाखेच्या पथकाने तपास सुरू केला. पोलिसांनी सराइतांची चौकशी सुरू केली. युवतीने दिलेल्या वर्णनानुसार पोलिसांनी संशयित आरोपींचे रेखाचित्र तयार केले होते. संशयितांची माहिती देण्याचे आवाहन पोलिसांनी केले होते. तांत्रिक तपासात मिळालेल्या माहितीनुसार पोलिसांच्या पथकाने पठाण आणि सातपुते यांना अटक केली.
