पुणे : महिलांना पैशांचे आमिष दाखवून स्पा सेंटरच्या नावाखाली सुरू असलेला वेश्या व्यवसाय गुन्हे शाखेच्या भरोसा सेलने छापा टाकून उघडकीस आणला आहे. याप्रकरणी आरोपीला बेड्या ठोकण्यात आल्या असून, दोन पीडित महिलांची सुटका करण्यात आली आहे. स्पा सेंटरचे मालक सूरज भरत शाहू (रा. वाशी ठाणे) याला अटक केली आहे.
विश्रांतवाडीतील धानोरी जकात नाका परिसरात असलेल्या गुडविल स्क्वेअर मॉलच्या दुसऱ्या मजल्यावर स्पा सेंटरच्या नावाखाली वेश्याव्यवसाय सुरू असल्याची माहिती गुन्हे शाखेच्या भरोसा सेलला मिळाली. त्यानुसार पथकाने त्याठिकाणी बनावट ग्राहक पाठवून खात्री केली. त्यानंतर छापा टाकून, दोन पीडित महिलांची सुटका केली. याप्रकरणी मालक असलेल्या शाहूला अटक केली आहे. अपर आयुक्त शैलेश बलकवडे, उपायुक्त निखिल पिंगळे, सहायक पोलीस आयुक्त गणेश इंगळे, पोलीस निरीक्षक संगीता जाधव यांच्या पथकाने कारवाई केली आहे.
हेही वाचा >>>‘प्यूमा ब्रँड’चे बनावट साहित्य विकणाऱ्या दुकानावर छापा; आठ लाखांचा मुद्देमाल जप्त
मसाज सेंटर गुन्हे शाखेच्या रडारवर
शहरातील विविध भागांत काही स्पा सेंटरमध्ये मसाजच्या नावाखाली वेश्याव्यवसाय चालविला जात असल्याचे दिसून आले आहे. मागील काही दिवसांत बाणेर, विश्रांतवाडी येथे करण्यात आलेल्या कारवाईवरून अधोरेखित झाले आहे. दरम्यान, याप्रकरणी आता गुन्हे शाखेने मसाज सेंटरविरूद्ध कारवाईचा बडगा उगारला आहे. गुन्हे शाखेकडून बेशिस्त, बेकायदा आणि नियमबाह्य मसाज सेंटरची माहिती संकलित करून कारवाईची मोहीम हाती घेण्यात आली आहे.
