१२ किलोमीटर लांबीपैकी १०.८ किलोमीटर लांबीचे काम पूर्ण पुणे : शिवाजीनगर (कृषी महाविद्यावलय)ते स्वारगेट या भुयारी मेट्रो मार्गिकेच्या एका बाजूच्या बोगद्याचे काम पूर्ण झाले आहे. कृषी महाविद्यालय ते स्वारगेट हे अंतर सहा किलोमीटर एवढे असून या अंतरात दोन स्वतंत्र बोगद्यांची कामे हाती घेण्यात आली असून एकूण बारा किलोमीटर लांबीपैकी १०.८ किलोमीटर लांबीच्या बोगद्याचे काम पूर्ण झाले आहे. मार्च अखेपर्यंत उर्वरीत १.२ किलोमीटर लांबीच्या बोगद्याचे काम पूर्ण करण्याचे नियोजन महाराष्ट्र मेट्रो रेल्वे कॉर्पोरेशनकडून (महामेट्रो) करण्यात आले आहे. पिंपरी-चिंचवड ते स्वारगेट या मेट्रो मार्गिके कृषी महाविद्यालयापर्यंत उन्नत असून त्यानंतर स्वारगटे पर्यंतची मार्गिका भुयारी आहे. भुयारी मेट्रो मार्गिकेचे काम वेगाने करण्यात येत असून टनेल बोरिंग मशीनद्वारे (टीबीएम) बोगदा निर्मितीची कामे प्रगतीपथावर आहेत. दोन बोगद्यांपैकी एका बाजूचे काम शुक्रवारी पूर्ण झाले. पवना या नावाचे टीबीएम बुधवार पेठेतील भुयारी मेट्रो स्थानकात पोहचले. दरम्यान स्वारगेटमधून निघालेले चौथे टीबीएम मंडई स्थानकाजवळ असून मार्च अखेर हे काम पूर्ण होईल, अशी माहिती महाराष्ट्र मेट्रो रेल्वे कॉर्पोरेशनने दिली. दोन बोगद्यांची लांबी १२ किलोमीटर एवढी आहे. त्यापैकी १०.८ किलोमीटर लांबीचे काम पूर्ण झाले आहे. भुयारी मार्गिकेचे अत्यंत आव्हानात्मक काम आहे. नागरिक आणि शासकीय संस्थांच्या पािठब्यांमुळे बोगद्याचे ९० टक्के काम पूर्ण झाले आहे. येत्या काही महिन्यात उर्वरीत कामे पूर्ण करण्यात येतील. - डॉ. ब्रिजेश दीक्षित, व्यवस्थापकीय संचालक, महामेट्रो
