मध्य प्रदेश सरकारच्या सांस्कृतिक विभागाच्या वतीने उज्जैन येथील अखिल भारतीय कालिदास समारोहामध्ये ज्येष्ठ चित्रकार वासुदेव कामत यांचा ‘राष्ट्रीय कालिदास सन्माना’ने गौरव करण्यात आला. मध्य प्रदेशचे राज्यपाल मंगूबाई पटेल यांच्या हस्ते कामत यांच्यासह शास्त्रीय संगीतातील योगदानाबद्दल ज्येष्ठ सतारवादक पं. बुधादित्य मुखर्जी, कथ्थक नृत्यातील योगदानाबद्दल डाॅ. पुरू दाधीच आणि ज्येष्ठ रंगकर्मी राजीव वर्मा यांना राष्ट्रीय कालिदास सन्मान प्रदान करण्यात आला. प्रत्येकी दोन लाख रुपये, प्रमाणपत्र, शाल आणि श्रीफळ असे या पुरस्काराचे स्वरूप होते. श्री तुलसी पीठाधीश्वर स्वामी रामभद्राचार्य आणि सांस्कृतिकमंत्री उषा ठाकूर या वेळी उपस्थित होत्या. हेही वाचा- ‘२०२४ च्या लोकसभा निवडणुकीत भाजपा ४०० पेक्षा अधिक जागांवर निवडून येईल’; चंद्रकांत पाटलांचा विश्वास साहित्य आणि कला आपल्याला सदैव प्रेरणा देत असते. त्यामुळे भारतीय संस्कृती, कला, साहित्य, इतिहास आणि महापुरुष यांच्याविषयी नव्या पिढीला वेळोवेळी माहिती देण्याचे काम करण्याची गरज आहे, असे राज्यपाल पटेल यांनी आपल्या भाषणात सांगितले. कामत म्हणाले, २०१२ मध्ये मी ‘कालिदासानुरूपम्’ ही मेघदूत आणि अभिज्ञानशाकुंतलम् यांवर आधारीत चित्र शृंखला प्रदर्शनी भरविली होती. त्यावेळी कविवर्य मंगेश पाडगावकर यांनी चित्रे पाहून काढलेले उद्गार सार्थकी झाले याचा मला आनंद वाटतो. ‘जर ही तुमची चित्रे प्रत्यक्ष कालिदासाने पाहिली असती तर या ठिकाणीच त्याने तुमचा जाहीर मुका घेतला असता.’, अशी भावना पाडगावकर यांनी व्यक्त केली होती. त्या कालिदासाचा मुका नव्हे पण त्याच्या नावे आलिंगन स्वरूप सन्मान मिळाला आणि मी कृतकृत्य झालो. कलाकारास कलाकाराच्या नावे मिळणारा पुरस्कार हा अधिक गौरवशाली असतो. आणखी आम्हाला काय हवे?
