फळभाज्या कडाडल्या : ‘या’ भाज्यांचे किलोचे दर शंभरी पार

घाऊक बाजारात गेल्या आठवडाभरापासून फळभाज्यांची आवक कमी प्रमाणावर होत आहे. मार्केट यार्डातील घाऊक बाजारात रविवारी राज्य, तसेच परराज्यातून ८० ते ९० ट्रक फळभाज्यांची आवक झाली. नेहमीच्या तुलनेत गेल्या दोन आठवड्यांपासून बाजारात फळभाज्यांची आवक कमी प्रमाणावर होत आहे. त्यामुळे बहुतांश फळभाज्यांच्या दरात १० ते २० टक्क्यांनी वाढ झाली आहे, अशी माहिती श्री छत्रपती शिवाजी मार्केट यार्डातील ज्येष्ठ अडते विलास भुजबळ यांनी दिली.

हेही वाचा – ३७ विद्यार्थ्यांना १०० पर्सेंटाइल; ‘एमएचटी-सीईटी’चे निकाल जाहीर

मध्यंतरी झालेल्या पावसामुळे फळभाज्यांच्या लागवडीवर परिणाम झाला. फळभाज्यांचे मोठे नुकसान झाले. नवीन लागवडीस किमान एक ते दीड महिन्यांचा कालावधी लागणार आहे. त्यामुळे फळभाज्यांचे दर तेजीत राहणार आहेत, असे त्यांनी नमूद केले.

फळभाज्यांचे एक किलोचे दर

कांदा – ४० ते ४५ रुपये

बटाटा – ४० ते ४५ रुपये

टोमॅटो- ७० ते ८० रुपये

भेंडी – १२० ते १४० रुपये

गवार – १५० ते १६०

वांगी – ८० ते १००

फ्लाॅवर – १०० ते १२०

कोबी – ७० ते ८०

मेथी – ४० ते ५०

कोथिंबीर – ५० ते ६०

कडक ऊन, तसेच पावसामुळे फळभाज्यांचे मोठे नुकसान झाले. नवीन लागवड पावसावर अवलंबून आहे. मुसळधार पाऊस झाल्यास लागवड, तसेच प्रतवारीवर परिणाम होतो. मागणीच्या तुलनेत फळभाज्यांची आवक कमी प्रमाणावर होत असल्याने दरात मोठी वाढ झाली आहे. – प्रकाश ढमढेरे, भाजीपाला विक्रेते, किरकाेळ बाजार

हेही वाचा – आंब्याच्या पेट्यांमधून गोव्यातील मद्याची तस्करी; १२ लाखांचे विदेशी मद्य जप्त

पालेभाज्यांच्या दरात तेजी

पावसाचा फटका पालेभाज्यांना बसला आहे. गेल्या पंधरा दिवसांपासून पालेभाज्यांची आवक कमी झाली आहे. बाजारात चांगल्या प्रतीच्या पालेभाज्यांची आवक कमी प्रमाणावर होत आहे. किरकोळ बाजारात कोथिंबिरीच्या एका जुडीचे दर ५० ते ६० रुपयांपर्यंत आहे. मेथीच्या एका जुडीचे दर ४० ते ५० रुपयांपर्यंत पोहोचले आहेत. बहुतांश पालेभाज्यांचे दर तेजीत असून, महिनाभर पालेभाज्यांचे दर तेजीत राहणार असल्याची माहिती मार्केट यार्डातील पालेभाजी व्यापारी राजेंद्र सूर्यवंशी यांनी दिली. मार्केट यार्डातील तरकारी विभागात रविवारी (१६ जून) कोथिंबीर एक लाख जुडी, तसेच मेथीच्या ३५ हजार जुडींची आवक झाली.