Snack Recipe: संध्याकाळच्या चहासोबत काहीतरी चटपटीत आणि कुरकुरीत खाण्याची इच्छा झाली की नेहमी भजी किंवा बटाट्याचे पदार्थ केले जातात. पण यावेळी नेहमीच्या पदार्थांना थोडा ब्रेक देऊन काहीतरी वेगळं करून पाहा. मूगडाळ आणि चीजपासून तयार होणारे कुरकुरीत रोल्स हा त्यासाठी एक भन्नाट पर्याय आहे. विशेष म्हणजे या रेसिपीसाठी मैदा किंवा ब्रेडची गरज नाही. बाहेरून कुरकुरीत आणि आतून वितळलेल्या चीजमुळे हा स्नॅक लहानांपासून मोठ्यांपर्यंत सगळ्यांनाच आवडेल.
साहित्य
- १ कप पिवळी मूगडाळ
- १ हिरवी मिरची
- १ छोटा तुकडा आलं
- १/२ चमचा जिरे
- १/२ चमचा लाल तिखट
- १/२ चमचा गरम मसाला
- १/२ चमचा चाट मसाला
- २ चमचे बारीक चिरलेली कोथिंबीर
- चवीनुसार मीठ
- १/२ कप किसलेलं चीज
- २ चमचे कॉर्नफ्लोअर
- तळण्यासाठी तेल
कृती
सर्वप्रथम मूगडाळ स्वच्छ धुऊन साधारण ३ ते ४ तास पाण्यात भिजत ठेवा. डाळ चांगली भिजल्यानंतर त्यातील पाणी काढून घ्या. मिक्सरच्या भांड्यात भिजवलेली डाळ, हिरवी मिरची, आलं आणि जिरे घालून थोडंसं पाणी वापरत जाडसर वाटून घ्या.
आता हे मिश्रण एका भांड्यात काढा. त्यात लाल तिखट, गरम मसाला, चाट मसाला, कोथिंबीर, मीठ आणि कॉर्नफ्लोअर घालून सर्व साहित्य व्यवस्थित एकत्र करा. मिश्रण खूप पातळ वाटत असल्यास थोडं कॉर्नफ्लोअर वाढवू शकता.
यानंतर हाताला थोडं तेल लावून मिश्रणाचा छोटा भाग घ्या आणि हाताने त्याला लांबट आकार द्या. त्याच्या मध्यभागी थोडं किसलेलं चीज ठेवा आणि चीज पूर्णपणे झाकलं जाईल अशा पद्धतीने रोल तयार करा.
कढईत तेल गरम करून तयार केलेले रोल्स मध्यम आचेवर सोनेरी आणि कुरकुरीत होईपर्यंत तळून घ्या. गॅस खूप मोठा ठेवू नका, अन्यथा बाहेरचा भाग पटकन तळला जाईल आणि आतला भाग व्यवस्थित शिजणार नाही.
तयार झालेले गरमागरम मूगडाळ चीज रोल्स प्लेटमध्ये काढा. हे रोल्स हिरवी चटणी किंवा टोमॅटो सॉससोबत सर्व्ह करा. कुरकुरीत आवरण आणि आतलं गरम चीज यामुळे हा हटके स्नॅक चहाच्या वेळेला नक्कीच पसंतीस उतरेल.
