Navratri Fasting Recipe: नवरात्रीच्या दिवसांत नाश्त्यासाठी काहीतरी नवीन करून पाहायचं असेल तर मखाना-पनीर अप्पे नक्की ट्राय करता येतील. मखान्याची पावडर, पनीर आणि बटाट्याचा वापर करून तयार होणारे हे छोटे अप्पे बाहेरून हलके कुरकुरीत आणि आतून मऊ असतात. दिसायला आकर्षक असल्यामुळे घरातील लहानांपासून मोठ्यांपर्यंत अनेकांना हा पदार्थ आवडू शकतो.
साहित्य
१ कप मखाना, १०० ग्रॅम पनीर, १ उकडलेला बटाटा, २ हिरव्या मिरच्या, २ टेबलस्पून कोथिंबीर, अर्धा चमचा जिरे, काळी मिरी पावडर, सैंधव मीठ, थोडा लिंबाचा रस आणि तूप.
कृती
सुरुवातीला मखाने कोरड्या कढईत मंद आचेवर भाजून घ्या. ते कुरकुरीत झाले की थंड करून मिक्सरमध्ये बारीक पावडर करा.
एका मोठ्या भांड्यात उकडलेला बटाटा मॅश करा. त्यात किसलेले पनीर, मखान्याची पावडर, बारीक चिरलेली हिरवी मिरची आणि कोथिंबीर घाला. त्यात जिरे, काळी मिरी पावडर, सैंधव मीठ आणि लिंबाचा रस घालून सर्व मिश्रण व्यवस्थित एकत्र करा.
आता अप्पेपात्र गरम करा आणि प्रत्येक कप्प्यात थोडे तूप सोडा. तयार मिश्रणाचे छोटे गोळे करून प्रत्येक कप्प्यात ठेवा. झाकण ठेवून मंद आचेवर काही मिनिटे शिजू द्या.
एका बाजूला सोनेरी रंग आला की चमच्याच्या मदतीने अप्पे अलगद फिरवा. दुसरी बाजूही भाजून घ्या. दोन्ही बाजूंनी हलका कुरकुरीतपणा आला की अप्पे तयार आहेत.
कृती
गरमागरम मखाना-पनीर अप्पे दही किंवा उपवासाला चालणाऱ्या चटणीसोबत सर्व्ह करा. नवरात्रीच्या नाश्त्यासाठी ही रेसिपी नेहमीच्या साबुदाणा पदार्थांना चांगला बदल देऊ शकते.
