नवरात्रीच्या उपवासासाठी बनवा हटके नाश्ता! साबुदाणा खिचडी विसरा, ‘या’ पदार्थापासून तयार करा कुरकुरीत पॅनकेक

मखाना आणि रताळ्याचा वापर करून तयार होणारा हा नाश्ता चवीला खमंग लागतो आणि कमी तेलात तव्यावरही छान तयार करता येतो. नवरात्रीच्या उपवासात कोणते पदार्थ चालतात याबाबत घराघरांत वेगवेगळ्या परंपरा असल्याने साहित्य वापरण्यापूर्वी आपल्या उपवासाच्या नियमांनुसार खात्री करून घ्या.

साहित्य

• १ कप मखाना
• १ मोठे उकडलेले रताळे
• २ टेबलस्पून भाजलेले शेंगदाणे
• १ हिरवी मिरची बारीक चिरलेली
• २ टेबलस्पून बारीक चिरलेली कोथिंबीर
• १/२ टीस्पून जिरे
• १/२ टीस्पून काळी मिरी पावडर
• १ ते २ टीस्पून लिंबाचा रस
• चवीनुसार सैंधव मीठ
• १ ते २ टीस्पून तूप
• आवश्यकतेनुसार थोडं पाणी

कृती

सर्वप्रथम कढई गरम करून त्यात मखाने घ्या आणि मंद आचेवर ४ ते ५ मिनिटं भाजून घ्या. मखाने कुरकुरीत झाले की ते मिक्सरमध्ये घेऊन बारीक पावडर करून घ्या. आता उकडलेलं रताळं एका भांड्यात चांगलं मॅश करा.

त्यात मखान्याची पावडर, कुटलेले शेंगदाणे, हिरवी मिरची, कोथिंबीर, जिरे, काळी मिरी, सैंधव मीठ आणि लिंबाचा रस घाला. हे मिश्रण चांगलं मळून घ्या. मिश्रण खूप कोरडं वाटत असेल तर थोडंसं पाणी घालून घट्टसर गोळा तयार करा.

आता हाताला थोडं तूप लावून मिश्रणाचे छोटे गोळे बनवा आणि त्यांना हलक्या हाताने पॅनकेकसारखा आकार द्या. तवा गरम करून त्यावर थोडं तूप सोडा. तयार केलेले पॅनकेक तव्यावर ठेवा आणि दोन्ही बाजूंनी सोनेरी व कुरकुरीत होईपर्यंत मंद आचेवर भाजा.

गरमागरम मखाना-रताळे पॅनकेक दह्यासोबत किंवा उपवासाला चालणाऱ्या हिरव्या चटणीसोबत सर्व्ह करा. सकाळच्या नाश्त्यासाठी ही रेसिपी चविष्ट तर आहेच, पण नेहमीच्या फराळाच्या पदार्थांपेक्षा थोडी हटकेही आहे.