Rava Sevai Stuffed Chilla Recipe: ऑक्टोबर महिना सुरू झाला की वातावरणात सणांचा उत्साह जाणवायला लागतो. नवरात्र, दसरा, दिवाळी अशा सणांची चाहूल लागल्यावर घरात वेगवेगळे पदार्थ बनवण्याची लगबग सुरू होते. अशावेळी नाश्त्यासाठी रोजचे पोहे, उपमा किंवा थालीपीठ करण्याऐवजी काहीतरी हटके ट्राय करायचं असेल, तर ही रेसिपी नक्की करून पाहा.
रवा आणि शेवयांपासून तयार होणारा हा स्टफ्ड चिल्ला बाहेरून हलका कुरकुरीत, तर आतून मऊ आणि चविष्ट लागतो. विशेष म्हणजे यामध्ये तुमच्या आवडीच्या भाज्यांचं सारण भरता येतं.
साहित्य
चिल्ल्यासाठी :
- १ कप बारीक रवा
- ½ कप भाजलेल्या शेवया
- ½ कप दही
- ½ कप पाणी
- १ हिरवी मिरची बारीक चिरलेली
- १ चमचा जिरे
- चवीनुसार मीठ
- १ चिमूट हिंग
- २ चमचे बारीक चिरलेली कोथिंबीर
- तेल आवश्यकतेनुसार
सारणासाठी :
- १ छोटा बटाटा उकडून कुस्करलेला
- ½ कप बारीक चिरलेली गाजर
- ½ कप बारीक चिरलेली शिमला मिरची
- १ छोटा कांदा बारीक चिरलेला
- ½ चमचा गरम मसाला
- ½ चमचा लाल तिखट
- ½ चमचा जिरे
- चवीनुसार मीठ
- १ चमचा तेल
कृती
सर्वप्रथम एका भांड्यात रवा, भाजलेल्या शेवया, दही, पाणी, जिरे, हिंग, हिरवी मिरची, मीठ आणि कोथिंबीर घालून एकत्र करा. हे मिश्रण साधारण १० ते १५ मिनिटे झाकून ठेवा. मिश्रण जास्त घट्ट वाटल्यास त्यात थोडं पाणी घालून डोश्याच्या पिठासारखी सैलसर कन्सिस्टन्सी करून घ्या.
आता सारण तयार करण्यासाठी कढईत तेल गरम करून त्यात जिरे आणि कांदा घाला. कांदा हलका सोनेरी झाला की गाजर आणि शिमला मिरची घालून दोन-तीन मिनिटे परता. त्यानंतर कुस्करलेला बटाटा, लाल तिखट, गरम मसाला आणि मीठ घालून सर्व साहित्य व्यवस्थित मिसळा. दोन मिनिटे परतून गॅस बंद करा.
तवा गरम करून त्यावर थोडं तेल पसरवा. त्यावर रव्याचं मिश्रण ओतून हलक्या हाताने गोलाकार पसरवा. चिल्ला एका बाजूने शिजू लागला की त्याच्या अर्ध्या भागावर तयार केलेलं भाजीचं सारण ठेवा आणि चिल्ला दुमडून घ्या.
दोन्ही बाजूंना थोडं तेल सोडून चिल्ला सोनेरी आणि कुरकुरीत होईपर्यंत भाजून घ्या. गरमागरम चिल्ला हिरवी चटणी, दही किंवा टोमॅटो चटणीसोबत सर्व्ह करा.
सणासुदीच्या सकाळी कुटुंबासाठी हा नाश्ता केला तर नेहमीच्या पदार्थांपेक्षा नक्कीच वेगळा अनुभव मिळेल!
