सध्या सुरू असलेल्या विम्बल्डन टेनिस स्पर्धेतील रविवारचा दिवस अनेक अर्थानी संस्मरणीय ठरला. आंतरराष्ट्रीय टेनिसची पंढरी मानल्या जाणाऱ्या विम्बल्डनच्या केंद्रस्थानी असलेल्या सेंटर कोर्टला यंदा १०० वर्षे पूर्ण झाली. १९२२मध्ये जेव्हा पहिल्यांदा या कोर्टवर सामने खेळवण्याविषयी ठरले, त्या वेळी त्याची संभावना ‘पांढरा हत्ती’ अशी करण्यात आली होती. पाहायला येणार कोण आणि किती संख्येने, असा प्रश्न त्या वेळी उपस्थित केला जायचा. परवा रविवारी जागतिक क्रीडा अवकाशात सर्वाधिक आदरणीय ठरू शकेल, अशा या कोर्टची शंभरी साजरी झाली तेव्हा जवळपास १५ हजारांच्या आसपास प्रेक्षकवृंद उपस्थित होता. विम्बल्डनचे बहुतेक सर्व माजी विजेते आणि विजेत्यांनी सेंटर कोर्टच्या हिरवळीवर उतरून विम्बल्डनच्या परंपरेला आणि संस्कृतीला मानवंदना दिली. प्रेक्षक आणि खेळाडू प्रतिसादाचा प्रश्नच आता कालबाह्य झाला आहे, हे यानिमित्ताने पुन्हा एकदा सिद्ध झाले.

या बातमीसह सर्व प्रीमियम कंटेंट वाचण्यासाठी साइन-इन करा

विम्बल्डनची लोकप्रियता सतत वृद्धिंगत होण्यामागची कारणे तशी अनेक. पारंपरिक अभिजातता न सोडता आधुनकतेचा वेध घेणारे ऑल इंग्लंड टेनिस क्लबचे हे संकुल जगभरातील टेनिसरसिकांवर आजही गारूड करून आहे. हिरव्या आणि जांभळय़ा रंगसंगतीच्या पार्श्वभूमीवर उठून दिसणारे टेनिसपटूंचे पांढरे पोशाख आणि पिवळेधमक टेनिस चेंडू, खास ब्रिटिश शिस्तीमध्ये एखाद्या ऑपेराप्रमाणे चालणारे सामन्यांचे परिचालन हे परंपराप्रेमींना मोहवणारे. तर सामन्यांच्या निमित्ताने फस्त होणारे लक्षावधी टन स्ट्रॉबेरी आणि क्रीम, तिकिटे मिळवण्यासाठी कित्येक दिवस आधी लावलेल्या रांगांचे सहलीकरण वगैरे बाबी तरुणाईला खुणावणाऱ्या. स्पर्धेच्या पहिल्या सोमवारी आदल्या वर्षीच्या पुरुष विजेत्याचा आणि पहिल्या मंगळवारी आदल्या वर्षीच्या महिला विजेतीचा सामना सेंटर कोर्टवरच सुरू होणार.

मराठीतील सर्व अन्वयार्थ बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Tennis wimbledon tennis tournament center court audience spectators and players amy
First published on: 05-07-2022 at 00:04 IST