लोकमानस: त्रिभाषा सूत्र फक्त महाराष्ट्रातच?

…तोवर आत्मघातकी ठरेल!

‘मिळतिल भूपाल अमित…’ हा अग्रलेख (१४ सप्टेंबर) वाचला. चीन आणि भारत यांच्यातील व्यापार- तफावत जवळपास १० लाख कोटी रुपयांहून अधिक आहे. चीनने आपल्यावर गलवानचा संघर्ष लादल्यानंतरही आपल्या बाजारातील चिनी वस्तूंची आवक वाढत राहिली. तरीसुद्धा ‘ब्रिक्स’ परिषदेत आपण म्हणतो की एकमेकांच्या सीमा एकमेकांच्या व्यापारासाठी सताड उघडा? खरे तर जोपर्यंत चीनच्या बाजारपेठेत स्थान मिळवण्याइतपत आपली कारखानदारी तगडी होत नाही तोपर्यंत व्यापारावरील नियंत्रणे उठवणे हे आपल्यासाठी आत्मघातकी ठरेल. – प्रभाकर दगाजी वारुळे, मालेगाव (जि. नाशिक)

काँग्रेस भाजपच्या गळास लागते!

‘जम्मू-काश्मिरात काँग्रेसच्या भूमिकेचा भाजपलाच फायदा!’ हा अन्वयार्थ (१४ सप्टेंबर) वाचला. ‘वंदे मातरम’ सारख्या भावनिक मुद्द्यांवर वाद घालून त्यावर आपली भाकरी भाजून घेणे नेहमीच भाजपसाठी फायद्याचे व काँग्रेससाठी अपायकारक ठरले आहे. अशा मुद्द्यांवर भाजप बाजी मारून जाते व काँग्रेस त्यांच्या गळाला लागते. या वादांमुळे मूळ मुद्दे बाजूला राहतात व राजकीय खेळींमुळे लोकांचे लक्ष विचलित होते. यातून राजकीय ध्रुवीकरण घडवून आणण्याची भाजपला सुवर्णसंधी मिळते. जम्मू-काश्मीरसारख्या आधीच वादाच्या भोवर्‍यात असलेल्या राज्यात हा वाद अधिकच फोफावतो आणि भाजपचा डाव पुन्हा यशस्वी होतो. – सरिता पोटे, अहिल्यानगर
loksatta@expressindia.com