चांदणी चौकातून: त्यांचा माफीनामा!

ऑरा ज्याचा त्याचा...

भाजप कुठल्याही गोष्टीचं उत्सवीकरण करत असतो, त्यामुळं नव्या राष्ट्रीय अध्यक्षाच्या पदग्रहण समारंभाचंही साजरीकरण होणार हे उघडच होतं. तरीही हा सोहळा वेगळाच होता हे मान्य केलं पाहिजे. कार्यकर्त्यांचा उत्साह ओसंडून वाहात होता. बहुतांश ‘एनसीआर’मधील होते. कार्यक्रम संपल्यानंतर खरी झुंबड उडालेली होती. भाजपच्या मुख्यालयात त्या दिवशी केवळ भाजपचे मुख्यमंत्रीच नव्हे तर केंद्रीय मंत्री, भाजपचे तरुण नेते, मार्गदर्शक मंडळात जाण्याची शक्यता असलेले नेते, राज्या-राज्यांतील छोटे-मोठे नेते, प्रदेशाध्यक्ष असा सगळा गोतावळा होता की, त्यांची रांग संपत नव्हती. मोदींचं भाषण झाल्यानंतर नितीन नबीन यांनी कार्यभार स्वीकारला. मग, त्यांना पुष्पगुच्छ देण्यासाठी झुंबड लागली. मीही तिथं होतो, असं भाजपच्या नेतृत्वाला आणि आपल्या राज्यातील भाजपच्या कार्यकर्त्यांना समजावं यासाठी काही नेत्यांची लगबग सुरू होती. वसुंधरा राजे वगैरेही मंडळी आलेली होती. राजकारणात उपयुक्त असल्याचं दाखवण्याचा हा सगळा प्रकार अर्धा-पाऊण तास सुरू राहिला. मग, मुख्यालयाच्या इमारतीतून एक-एक मुख्यमंत्री बाहेर पडू लागला. तोपर्यंत मोदी निघून गेलेले होते. त्यामुळं सुरक्षाव्यवस्था सैल झाली होती. कार्यकर्ते आत-बाहेर करत होते. त्यांना आपापल्या मुख्यमंत्र्यासोबत फोटो काढून घ्यायचा होता. हाताच्या अंतरावर भाजपचे इतके सगळे मुख्यमंत्री त्यांना तरी कुठं भेटणार? तेवढीच संधी कार्यकर्त्यांना मिळाली. फोटोसाठी ते इतके धावाधाव करत होते आणि वेगवेगळ्या मुख्यमंत्र्यांना त्यांनी इतकं घेरलं होतं की, त्यातून उत्तर प्रदेशचे मुख्यमंत्री योगी आदित्यनाथही सुटले नाहीत. इतरही मुख्यमंत्री होते पण, योगी भाजपच्या कार्यकर्त्यांमध्ये लोकप्रिय आहेत म्हणजे काय हे तिथं प्रत्यक्ष दिसलं. योगी प्रवेशद्वारातून बाहेर पडताच त्यांना भेटण्यासाठी कार्यकर्ते धावले. एकदा उजव्या बाजूला तर एकदा डाव्या बाजूला असं करत योगी त्यांना चकवण्याचा प्रयत्न करत होते. पण, कार्यकर्त्यांनी काही योगींना सोडलं नाही. योगींभोवती असा गराडा घातला की त्यांना हलताच येईना. ‘योगीजी जय श्रीराम’ अशा घोषणा देत कार्यकर्त्यांनी फोटो काढले. या घोषणांमधून कार्यकर्त्यांनी योगींनाच रामाचा अवतार करून टाकलं होतं. या गर्दीमुळं योगींना मुख्यालयाच्या आवारात स्वत:च्या कारमध्ये बसता आलं नाही. ते तसंच पुढे चालत गेले आणि मुख्यालयाच्या बाहेर जाऊन गाडीत बसले. भाजपमध्ये योगी हेच सर्वात लोकप्रिय मुख्यमंत्री असल्याचं तिथं दिसलं. तिथं देवेंद्र फडणवीस आलेले नव्हते. त्यामुळं त्यांची लोकप्रियता काय असती हे काही सांगता येणार नाही. पण, योगींचा ऑरा दिसला. भाजपच्या इतरही मुख्यमंत्र्यांभोवती गराडा पडला होता. कार्यकर्त्यांचं फोटोसेशन होत होतं. अनेक मुख्यमंत्र्यांना मुख्यालयाच्या बाहेर येऊन मग कारमध्ये बसावं लागलं. मोहन यादव, भजनलाल शर्मा, रेखा गुप्ता, पुष्कर धामी असे अनेक. केंद्रीय मंत्र्यांमध्ये शिवराजसिंह चौहान यांची लोकप्रियता अजून टिकून असल्याचंही दिसलं. त्यांनाही कार्यकर्त्यांनी घेरलेलं होतं. भाजपमध्ये ज्याचा त्याचा ऑरा अशा सोहळ्यांमध्ये पाहायला मिळतो.

नव्या चमूत महाराष्ट्रातील कोण?

भाजपच्या नव्या राष्ट्रीय अध्यक्षांबरोबर त्यांचा नवा चमूही काही दिवसांमध्ये कार्यरत होईल. त्यांच्या चमूत कोणा-कोणाला संधी मिळेल याची उत्सुकता लागलेली आहे. त्यातही महाराष्ट्रातून कोणत्या नेत्याला राष्ट्रीय स्तरावर काम करता येईल हेही महत्त्वाचं असेल. आत्ता केवळ विनोद तावडे हेच मराठी नेते राष्ट्रीय महासचिवपदावर आहेत. बाकी उल्लेख करावा असा मराठी नेता राष्ट्रीय कार्यकारिणी वा राष्ट्रीय संघटनेमध्ये नाही. विनोद तावडेंनी बिहार जिंकून दिलेलं आहे. आता त्यांच्याकडे केरळची मोठी जबाबदारी दिलेली आहे. चंडीगड तर आहेच. तावडे बिहारमुळं नबीन यांना ओळखतात, राष्ट्रीय स्तरावर कामाचा अनुभव असलेला आणि संघटनात्मक कौशल्य असलेला विनोद तावडेंसारखा तगडा नेता नबीन जाऊ देणार नाहीत. आता यापुढच्या काळात तावडे राष्ट्रीय महासचिवच राहतात की, त्यांना बढती देऊन उपाध्यक्ष केलं जाईल हे पाहायचं. या वेळी केरळमध्ये भाजपला विधानसभा निवडणुकीत काही जागा मिळण्याची शक्यता दिसू लागली आहे. तावडेंची विजयगाथा कायम राहील असं दिसतंय. तावडेंना बढती दिली तर कदाचित महाराष्ट्रातून आणखी एका तगड्या नेत्याला राष्ट्रीय स्तरावर काम करण्याची संधी मिळू शकेल. ते केंद्रीय गृहमंत्री अमित शहांच्या अत्यंत जवळचे मानले जातात. दिल्लीत येऊन ते वारंवार शहांना भेटूनही जातात, पण ते बोलत नाहीत. त्यांचं देवेंद्र फडणवीस यांच्याशी पटतं असं नाही पण, त्यांच्यामध्ये दुरावाही नाही. त्यांना २०२४च्या लोकसभा निवडणुकीत मुंबईतून उतरवण्याचा विचार राज्यातील बड्या नेत्याने केला होता. पण केंद्रीय नेत्याने ही उमेदवारी मान्य केली नाही. आता इतर राज्याची जबाबदारी देण्यात आल्यामुळं त्यांना नबीन यांच्या चमूत घेतलं जाऊ शकतं. सध्या नबीन यांचा भाजपच्या राष्ट्रीय नेते व पदाधिकाऱ्यांच्या बैठकांचा सिलसिला सुरू आहे, त्यामुळं नवा चमू काही दिवसांत कळेल.

शहांनी नबीन यांना शोधलं कसं?

तरुण नेत्यांना शोधून संधी देण्याचं काम भाजपमध्ये भक्तिभावाने केलं जातं. त्याचाच भाग म्हणून नितीन नबीन यांना राष्ट्रीय अध्यक्षपदी बसण्याची संधी देण्यात आलेली आहे. खरी सत्ता मोदी-शहांच्या हातात राहील हे वेगळं सांगण्याची गरज नाही पण, नव-नवे चेहरे राष्ट्रीय स्तरावर आणले जातात. त्याचं श्रेय केंद्रीय गृहमंत्री अमित शहांकडं जातं. नबीन यांच्यातील निष्ठा आणि कौशल्य शोधण्याचं काम शहांनी केलं. शहांच्या या निष्ठावानाला संघही नाकारू शकला नाही यातून भाजपच्या संघटनेवरील शहांची पकड किती घट्ट आहे, हे लक्षात येईल. नितीन नबीन यांचे वडील संघनिष्ठ होते, ते आमदार होते, त्यांच्या नंतर नितीन यांनी आमदारकीचा वारसा कायम ठेवला. भाजपच्या युवा मोर्चाचे ते राष्ट्रीय महासचिव होते हा भाग वेगळा. त्यांनी छत्तीसगढचे सहप्रभारी म्हणून उत्तम काम केलं, हे काम शहांच्या डोळ्यात भरलं. छत्तीसगढमध्ये नितीन यांनी भाजपच्या संघटनात्मक बांधणीवर भर दिला होता. इथली विधानसभा निवडणूक पुन्हा काँग्रेस जिंकणार आणि भूपेश बघेलच मुख्यमंत्री होणार असं मानलं जात होतं. अखेरच्या टप्प्यात ही निवडणूक पूर्ण फिरली आणि भाजपला पुन्हा सत्ता मिळाली. या विजयातून नितीन नबीन भाजपच्या रंगमंचावर अवतरले! ते चाळिशीत आहेत, संपूर्ण प्रदेश सांभाळू शकतात. संघटनात्मक कौशल्य असल्याचं सिद्ध केलंय. हे सगळे गुण दिसले, त्यातून त्यांचं नाव संभाव्य राष्ट्रीय अध्यक्षांच्या यादीत आलं. पण, ही कौशल्यं पुरेशी ठरतातच असं नाही. प्रभारी वा प्रदेशाध्यक्ष म्हणून वित्तीय जाळं विणण्याची क्षमता आहे की नाही हेही पाहिलं जातं. त्यामध्येही नबीन खरे उतरले. वेळ पडली तर ते भाजपचे योग्य खजिनदारही होऊ शकतात असं म्हणतात. ही सर्वात उजवी बाजू असते. शिवाय, यावेळी राष्ट्रीय अध्यक्ष निवडताना तीन-चार निकष ठरवले गेले. अध्यक्ष तरुण हवा, देशभर अव्याहत फिरून तरुण नेत्यांशी जोडणारा हवा, संघालाही रुचेल असा हवा आणि उच्चवर्णीय हवा. शिवाय, प्रसारमाध्यमांच्या वा भाजपमधील नेत्यांच्या रडारवर नसेल असाही हवा. हे सगळे निकष नबीन पूर्ण करत होते. मग, त्यांची निवड होणं अनेकांसाठी धक्कादायक असली तरी, मोदी-शहांसाठी केवळ औपचारिकता ठरली.