व्यक्तिवेध: नेव्हिल टाटा

भारतातील सर्वांत प्रतिष्ठित व्यावसायिक कुटुंबात जन्म होऊन, शांतपणे पण स्थिरपणे नेव्हिल आपली छाप पाडत आहेत. आजवर प्रसिद्धी आणि प्रकाशझोतापासून दूर राहणे हे जाणीवपूर्वक घडले असे नव्हे तर तो त्यांचा स्वाभाविक नैसर्गिक गुणच आहे. लंडनमधील ‘बेयस बिझनेस स्कूल’मधून शिक्षण पूर्ण केल्यानंतर, नेव्हिल २०१६ मध्ये टाटा समूहात सामील झाले. त्यांनी त्यांच्या आजी सिमोन टाटा यांनी स्थापन केलेल्या ‘ट्रेंट लिमिटेड’ या ब्रँडेड कपडे, पादत्राणे, अॅक्सेसरीज, वैयक्तिक निगा आणि होम फर्निशिंग यांसारख्या फॅशन आणि लाइफस्टाइल उत्पादनांच्या किरकोळ व्यवसायांत काम सुरू केले. ‘वेस्टसाइड’ (फॅशन), ‘झुडिओ’ (कपडे), ‘उत्सा’ (पारंपरिक भारतीय पोशाख) आणि ‘स्टार बाजार’ (सुपरमार्केट) अशा यशस्वी नाममुद्रा उभ्या केल्या. ‘ट्रेंट’चा उपक्रम असलेल्या ‘झुडिओ’मध्ये जाण्यापूर्वी त्यांनी प्रथम ‘पॅकेज्ड फूड अँड बेव्हरेजेस’ विभागाचे नेतृत्व केले. त्यांच्या नेतृत्वात, ‘झुडिओ’ भारतातील सर्वांत मोठ्या पोशाख नाममुद्रेमध्ये रूपांतरित झाले. ‘झुडिओ’ला आकार देण्याचे श्रेय नेव्हिल यांना जाते. ‘स्टार बाजार’चे प्रमुख म्हणून २०२४ मध्ये पदभार स्वीकारण्यापूर्वी नेव्हिल यांनी टाटा समूहाच्या ‘ट्रेंट हायपरमार्केट’मध्ये बिगर कार्यकारी संचालक म्हणूनही काम केले.

त्यांचा कामाचा वाढलेला आवाका आणि वाढत्या जबाबदाऱ्या यातून नियोजनपूर्वक केलेली प्रक्रियाच दिसते. अर्थात त्यांच्या कार्याचा अनुभव आणि धोरणात्मक संतुलनही ती प्रतिबिंबित करते.

त्यांच्या व्यावसायिक जीवनापलीकडे, नेव्हिल यांचे कौटुंबिक संबंध भारताच्या औद्याोगिक परिदृश्यात खोलवर रुजले आहेत. त्यांच्या बहिणी, लीआ आणि माया टाटादेखील समूहात सक्रिय आहेत. लीआ ‘इंडियन हॉटेल्स’मध्ये तर माया ‘टाटा डिजिटल’मध्ये काम करते. दिवंगत उद्याोगपती विक्रम किर्लोस्कर यांची मुलगी मानसी किर्लोस्कर यांच्याशी लग्नबंधनात अडकलेले नेव्हिल कौटुंबिक आणि व्यावसायिक पातळीवर समतोल साधून आहेत. आता टाटा न्यासांवर नेव्हिल यांची नियुक्ती होणे हे टाटा समूहाच्या कंपन्यांच्या कारभारात येत्या काळात ते मोठी भूमिका बजावणार असल्याचेच पूर्वसंकेत आहेत. टाटा समूहाच्या वार्षिक कार्यक्रमात नियमित उपस्थिती लावणारे, पिढीजात वारशाचे महत्त्व जाणणारे नेव्हिल यांच्याच हाती हा वारसा येऊ घातला आहे.