बुक-नेट: जुनी लेखिका, नव्याने…

नॉफ डबलडे या जगप्रसिद्ध प्रकाशनाचीच शाखा असलेली ‘आऊटसायर एडिशन्स’ गेल्या वर्षी सुरू झाली ती नजीकच्या भूतकाळात गाजून गायब झालेल्या पुस्तकांना पुन्हा उपलब्ध करून देण्यासाठी. ऐंशी-नव्वदीच्या दशकात भरपूर चर्चा झालेल्या आणि आता दुकानांत-वाचनालयांत कुठेच उपलब्ध नसलेल्या पुस्तकांचा जीर्णोद्धार करणे हा तिचा मुख्य उद्देश. याच आठवड्यात त्यांची सहा पुस्तके नव्याने आली. त्यात शिवा नायपॉल यांच्या ऐंशी सालातील गाजलेल्या रिपोर्ताजाचे पुस्तक ‘जर्नी टू नोव्हेअर’ आहेच. त्याशिवाय केट ब्रेव्हरमन या लेखिकेचा लॉस एंजेलिसमधील महिलांना केंद्रस्थानी ठेवून लिहिलेला ‘स्क्वॉण्डरिंग द ब्लू’ हा कथासंग्रहदेखील नव्या प्रस्तावनेसह दाखल झाला आहे. गेल्या महिन्याभरापासून या नव्या आवृत्तीनिमित्ताने नव्वदीत लेखिकांना धाडसी लिहिण्यास प्रवृत्त करणार्‍या ब्रेव्हरमन आणि तिच्या बर्‍यापैकी अदृश्य झालेल्या पुस्तकावर चर्चा होत आहे. कवी, कादंबरीकार आणि कथालेखिका असा एकूण १२ पुस्तकांचा तिचा प्रवास. ३५ वर्षांच्या विरामानंतर नव्याने येणारे हे पुस्तक आजही स्फोटक का आहे, हे सांगणारा ताजा लेख. त्यासह केट ब्रेव्हरमनचे कोकेनग्रस्त तारुण्य ते व्यसनमुक्त काळातील कथालेखन शिकवणारा वर्ग असा जीवनपट चितारणारा काही वर्षांपूर्वीचा एक उत्तम लेख.