पश्चिम रेल्वेवरील बोईसर रेल्वे स्थानकात २३ वर्षीय तरुणाने आत्महत्येचा प्रयत्न केला. सुदैवाने रेल्वे प्रशासनाने ओव्हर हेड वायरचा वीज पुरवठा खंडीत केल्याने अनर्थ टळला आहे. मात्र, या गोंधळामुळे बोईसरवरुन डहाणूकडे जाणारी रेल्वे वाहतूक सकाळी जवळपास एक तास ठप्प होती. सोमवारी सकाळी मोहम्मद तमन्ने शेख हा तरुण हातात चाकू घेऊन बोईसर स्थानकात पोहोचला. यानंतर तो स्थानकातील पादचारी पुलावर गेला आणि ओव्हर हेड वायरजवळ उभे राहून आत्महत्येचा प्रयत्न करु लागला. हा प्रकार पाहताच स्थानकातील प्रवाशांनी घटनेची माहिती पोलिसांना दिली. रेल्वे पोलीस आणि अग्निशमन दलाचे पथक घटनास्थळी पोहोचले.जवळपास तासाभरानंतर मोहम्मदची समजूत काढून त्याला खाली उतरवण्यात यश आले. मोहम्मदने सासरच्या जाचाला कंटाळून हे पाऊल उचलले होते, अशी माहिती समोर आली आहे. या घटनेमुळे या मार्गावरील रेल्वे सेवा सुमारे तासभर ठप्प होती. दुपारपर्यंत या मार्गावरील गाड्या उशिराने धावत होत्या.
