बदलापूर : शासनाच्या करोना उपचार नियमावलीला झुगारून वांगणीत एका दवाखान्यात एका खासगी डॉक्टरने करोना रुग्णांवर मनमानी उपचार सुरू केले होते. या डॉक्टरची उपचार आणि रुग्ण बरे करण्याच्या दाव्यांची एक चित्रफीत समाजमाध्यमांवर प्रसारित झाल्यानंतर जिल्हा आरोग्य यंत्रणेने त्या डॉक्टरविरुद्ध गुन्हा दाखल केला आहे. डॉ. उमाशंकर गुप्ता असे या डॉक्टरचे नाव असून तालुका आरोग्य अधिकारी डॉ. संजय बनसोडे यांच्या तक्रारीवरून कुळगाव पोलीस ठाण्यात हा गुन्हा दाखल करण्यात आला आहे. डॉ. गुप्ता याने स्वयंघोषित उपचार करण्यासाठी जिल्हा प्रशासनाची कोणतीही परवानगी घेतली नव्हती. हा डॉक्टर रुग्णांना मुखपट्टी असल्यास प्रवेश देत नव्हता!
