21 September 2020

News Flash

श्रावणातही सामिष आहाराकडे कल

करोनाकाळात रोगप्रतिकारक शक्ती वाढवण्याचे प्रयत्न

संग्रहित छायाचित्र

चिकन, मटणच्या दुकानांतील गर्दी कायम; करोनाकाळात रोगप्रतिकारक शक्ती वाढवण्याचे प्रयत्न

किशोर कोकणे/पूर्वा साडविलकर

ठाणे : करोना काळात रोगप्रतिकारक शक्ती वाढावी, यासाठी प्रथीनेयुक्त आहार करण्याचा सल्ला पाळण्यासाठी अनेकांनी श्रावणातील मांसाहार बंदीवर पाणी सोडले आहे. दररोजच्या जेवणात अंडींचे सेवन करण्यासोबतच चिकन, मटण, मासळीयुक्त आहाराकडेही नागरिकांचा कल कायम आहे. त्यामुळे गेल्या काही वर्षांच्या तुलनेत यंदा श्रावण महिना सुरू असतानाही व्यवसायात फारशी घट नसल्याचे विक्रेत्यांचे म्हणणे आहे.

श्रावण महिना सुरू होताच अनेकजण मांसाहार सोडून फक्त शाकाहाराचा अवलंब करतात. त्यामुळे चिकण, मटण आणि मासळीची मागणी कमी झाल्याने त्याचे दरही कमी होत असतात. मात्र, यावर्षी करोनाचा प्रादुर्भाव कायम असल्याने अनेकांनी श्रावणावर पाणी सोडले आहे. करोना काळात आपली रोगप्रतिकारक शक्ती वाढविण्यासाठी हा निर्णय घेतला आहे, असे ग्राहक सांगत आहेत. शहरात रविवार, बुधवार आणि शुक्रवारी मासळी बाजार तसेच मटण-चिकण, मासळीला मागणी कायम आहे. त्यातही अधिक प्रथिने देणाऱ्या ‘चिकन ब्रेस्ट’ला अधिक मागणी असल्याचे कासरवडवली येथील कासम मुलाणी या कोंबडीविक्रेत्याने सांगितले. अनेकजण फोनवरून नोंदणी करत असल्याचेही ते म्हणाले.

श्रावण महिन्यात मागणी घटल्याने कोंबडी तसेच अंडय़ाच्या दरात घसरण होते. मात्र, यंदा ती परिस्थिती नाही. सध्या ठाण्यात ब्रॉयलर कोंबडी २६० रूपये प्रतिकिलोने दराने विकली जात आहे. तर, अंडे प्रति नग ५ रुपयाने विकले जात आहे. ग्राहकांकडून मागणी कायम असल्याने दरही कमी झाले नसल्याचे विक्रेते विश्वास माळगावकर यांनी सांगितले. तर, व्यवसायावर फारसा परिणाम झाला नसल्याची माहिती म्हावरावाला डॉट कॉम या कंपनीचे संचालक सागर पाटील यांनी दिली.

करोनाकाळात नागरिकांमध्ये रोगप्रतिकारशक्ती असणे आवश्यक आहे. त्यामुळे नागरिकांचा कल श्रावणातही मांसाहाराकडे कायम आहे. मांसाहारामुळे नागरिकांना प्रथिने मिळतात. त्यातही अंडय़ांमध्ये उत्तम प्रथिने असतात. त्यासोबतच जीवनसत्त्वही शरिराला आवश्यक आहेत. त्यामुळे नागरिकांनी मांसाहारासोबत हिरव्या पालेभाज्याही खाव्यात. प्रथिने आणि जीवनसत्त्वे मिळाल्यास तुमची रोगप्रतिकारक शक्ती आणखी वाढेल.

 डॉ. संतोष कदम, अध्यक्ष, ठाणे इंडियन मेडीकल असोसिएशन.

मी सलग १५ वर्षे श्रावणात मासाहाराचे सेवन करत नाही. यंदा करोना काळात प्रथीनेयुक्त आहार नियमीत मिळावा यासाठी मासाहार बंद करु नये असे मी ठरविले. याशिवाय घरातून काम असल्याने व्यायामाला अधिक वेळ मिळत आहे. काही व्यायामासाठी असा आहार पोषक ठरतो.

निरंजन चव्हाण, ग्राहक

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on August 7, 2020 1:57 am

Web Title: even in shravan tends towards non vegetarian food zws 70
Next Stories
1 सार्वजनिक गणेशोत्सव अडीच दिवसांचा
2 ठाणे जिल्ह्य़ात दिवसभरात ४४ जणांचा मृत्यू
3 धरणांच्या पाणीसाठय़ात समाधानकारक वाढ
Just Now!
X