डोंबिवलीत एका फरसाण दुकानात गुरुवारी रात्री भीषण आग लागली. या आगीत जीवितहानी झालेली नाही. आगीचे वृत्त समजताच अग्निशमन दलाचे पथक घटनास्थळी दाखल झाले. आगीचे नेमके कारण अद्याप समजू शकलेले नाही. डोंबिवली पूर्वेतील पी अँड टी कॉलनी परिसरात माया फरसाण हे दुकान आहे. या दुकानात गुरुवारी रात्री भीषण आग लागली. आगीचे नेमके कारण अजून समजू शकलेले नाही. मात्र, आग वेगाने पसरल्याने परिसरात भीतीचे वातावरण निर्माण झाले. दुकानाच्या वर निवासी इमारत असल्याने चिंतेत भर पडली. मात्र, आगीवर नियंत्रण मिळवण्यात यश आले आणि सर्वांनीच सुटकेचा श्वास सोडला. डिसेंबरमध्ये कुर्ला येथील भानू फरसाण या दुकानात लागलेल्या आगीच्या घटनेनंतर आता डोंबिवलीतील फरसाण दुकानात आग लागली आहे. सुदैवाने यात जीवितहानी झालेली नसली तरी या घटनेमुळे शहरातील दुकानांमधील सुरक्षेचा प्रश्न पुन्हा एकदा चव्हाट्यावर आला आहे.
