17 November 2019

News Flash

खड्डय़ांचा ताप सुरू!

ठाण्यात अकराशेहून अधिक खड्डय़ांची नोंद; ७२३ खड्डे बुजवल्याचा पालिकेचा दावा

ठाण्यात अकराशेहून अधिक खड्डय़ांची नोंद; ७२३ खड्डे बुजवल्याचा पालिकेचा दावा

ठाणे : गेल्या काही दिवसांपासून सुरू असलेल्या संततधार पावसामुळे ठाणे शहरातील रस्त्यांवर दर वर्षीप्रमाणे खड्डे दिसू लागले आहेत. शहरात आतापर्यंत ११२२ खड्डय़ांची नोंद झाली असून त्यामध्ये सर्वाधिक ४३५ खड्डे घोडबंदरमधील रस्त्यांवर आढळले असून २५६ खड्डे वागळे इस्टेट भागातील आहेत. आतापर्यंत ७२३ खड्डे बुजवण्यात आले असून ३९९ खड्डे बुजवण्याची कामे सुरू असल्याचे ठाणे महापालिका प्रशासनाने म्हटले आहे. मात्र, प्रत्यक्षात शहरातील रस्त्यांवर मोठय़ा प्रमाणात खड्डे पडले असून त्याकडे पालिकेचे लक्ष गेले नसल्याची नागरिकांची तक्रार आहे.

ठाणे महापालिका क्षेत्रात जुलै महिन्याच्या पहिल्या आठवडय़ापासून पाऊस सुरू झाला आहे. या पावसामध्ये ब्रह्मांड, कावेसर, तुर्फेपाडा या भागातील रस्ते ठिकठिकाणी खचल्याची बाब समोर आली होती. या ठिकाणी मलनि:सारण वाहिन्या टाकण्यासाठी १५ ते २० फूट खोल खड्डे खोदण्यात आले होते. वाहिन्या टाकल्यानंतर त्यावर दगड आणि मातीचा भराव टाकून रस्त्याचे काम करण्यात आले होते. मात्र, दगड आणि मातीचा भराव योग्य पद्धतीने टाकण्यात आला नसल्यामुळे ठिकठिकाणी रस्ता खचल्याचे महापालिकेच्या निर्दशनास आले होते. त्यानंतर महापालिकेने संबंधित ठेकेदाराकडून याठिकाणी दुरुस्तीची कामे करण्यास सुरुवात केली आहे.

असे असतानाच गेल्या तीन दिवसांपासून सतत सुरू असलेल्या पावसामुळे शहरातील रस्त्यांवर ठिकठिकाणी खड्डे पडल्याचे चित्र आहे. या खड्डय़ांमधून वाहन चालविताना चालकांना तारेवरची कसरत करावी लागत आहे. खड्डय़ांजवळ चालकवाहनांचा वेग अचानकपणे कमी करत असून यामुळे पाठीमागून येणारे वाहन धडकून अपघात होण्याची भीती व्यक्त होत आहे. या खड्डय़ांमुळे महामार्गासह अंतर्गत मार्गावर वाहतूक संथगतीने होत असल्यामुळे वाहतूक कोंडी होत असल्याचे चित्र आहे.

ठाणे महापालिका क्षेत्रामध्ये ११२२ खड्डे पडले असून या खड्डय़ांचे क्षेत्रफळ २३३८ चौ.मी इतके आहे. नौपाडा, हरिनिवास सर्कल, कोरस रोड, लक्ष्मीपार्क परिसर, नितीन कंपनीजवळील सेवा रस्ते, रामचंद्रनगर, कळवा, मनीषानगर, गोकुळनगर, कॅसलमील, मुंब्रा, दिवा, उथळसर, लोकमान्यनगर, सावरकरनगर या भागातील अंतर्गत रस्त्यांवर खड्डे पडले आहेत. वागळे इस्टेट भागातील इंदिरानगर येथील रस्त्याची अक्षरश: चाळण झाल्याचे दिसून येते.

मुंबई-नाशिक महामार्गावरील फ्लॉवर व्हॅलीजवळ मोठे खड्डे पडले असून मंगळवारी पेव्हर ब्लॉक टाकून हे खड्डे बुजविण्याची कामे सुरू होती. याशिवाय, या मार्गालगतच्या सेवा रस्त्यांवरही खड्डे पडले आहेत. घोडबंदर भागातील मुंबई-अहमदाबाद महामार्गासह सेवा रस्त्यांवर खड्डे पडले आहेत. माजिवाडा, कापूरबावडी भागात पेव्हर ब्लॉक उखडले असून त्या ठिकाणी मोठे खड्डे पडले आहेत.

 

खड्डे कुठे, किती?

प्रभाग समिती              संख्या                     भरलेले खड्डे                     शिल्लक खड्डे

नौपाडा-कोपरी               ७८                               ४७                                        ३१

दिवा                            ११८                               ४८                                         ७०

उथळसर                       १८                                १३                                         ५

मुंब्रा                               ६०                               ५३                                         ७

कळवा                        १०४                                  ७२                                      ३२

माजिवाडा-

मानपाडा                    ४३५                                 ४१०                                      २५

वर्तकनगर                    १५                                  ११                                        ४

लोकमान्य-

सावरकर                      ३८                                   २०                                        १८

वागळे इस्टेट                २५६                               ४९                                         २०७

एकूण                          ११२२                             ७२३                                        ३९९

 

ठाणे महापालिका क्षेत्रातील रस्त्यांवर ११२२ खड्डे पडले असून त्यापैकी ७२३ खड्डे बुजविण्यात आले आहेत. उर्वरित ३९९खड्डे बुजविण्याची कामे सुरु आहेत. कोल्डमिक्स पद्धतीने खड्डे बुजविण्यात आले असून काही मोठे खड्डे जेट पॅचर यंत्राने बुजविण्यात येणार आहेत.

– रवींद्र खडताळे, शहर अभियंता, ठाणे महापालिका

First Published on July 11, 2019 1:37 am

Web Title: more than eleven hundred potholes recorded in thane zws 70