महापालिका क्षेत्रात दिवसेंदिवस करोनाबाधित रुग्णांच्या संख्येत वाढ होत असतानाच, गुरूवारी दिवसभर शहरातील खासगी करोना चाचणी केंद्र दर आकारणीच्या वादामुळे बंद होती. त्यामुळे महापालिकेच्या करोना चाचणी केंद्रावर नागरिकांच्या तपासणीसाठी रांगा वाढल्याचे चित्र होते. या संदर्भात महापालिका प्रशासनाने गुरुवारी सायंकाळी खासगी करोना चाचणी केंद्राच्या प्रतिनिधींशी बैठक घेऊन करोना चाचणीचे दर यापुढे तीन हजार रुपये करण्याचा निर्णय घेतला. या निर्णयास सर्वच प्रतिनिधींनी मान्यता दिल्याने नागरिकांचे आता दिड हजार रुपये वाचणार असल्याचा दावा प्रशासनाने केला. शहरामध्ये महापालिकेचे एक करोना चाचणी केंद्र आहे. याशिवाय, तीन खासगी प्रयोग शाळांमार्फत शहरात करोना चाचणी केंद्र चालविण्यात येतात. या तिन्ही प्रयोगशाळांच्या केंद्रामध्ये दिवसाला प्रत्येकी शंभर ते दोनशे नागरिकांची करोना चाचणी केली जाते. असे असले तरी त्यापैकी एका प्रयोगशाळेच्या केंद्राकडून चाचणीसाठी तीन हजार रुपये आकारले जातात तर उर्वरित दोन प्रयोग शाळेच्या केंद्रांकडून चाचणीसाठी साडेचार हजार रुपये आकारले जात आहेत. या दर आकारणीवरूनच गेल्या काही दिवसांपासून वाद सुरु होता. तसेच महापालिका क्षेत्रात चाचणीसाठी वेगवेगळे दर असल्याने प्रशासनावरही टिका होत होती. या पाश्र्वभूमीवर महापालिकेचे अतिरिक्त आयुक्त गणेश देशमुख यांनी बुधवारी खासगी करोना चाचणी केंद्राच्या प्रतिनिधींसोबत बैठक घेऊन चाचणीचे दर कमी करून ते एकसारखेच ठेवण्याच्या सुचना केल्या होत्या. त्यामुळेच गुरुवारी दिवसभर शहरातील खासगी करोना चाचणी केंद्र बंद ठेवण्यात आली होती. या काळात केवळ महापालिकेचे करोना चाचणी केंद्र सुरु असल्यामुळे तिथे नागरिकांच्या तपासणीसाठी रांगा वाढल्याचे चित्र होते. ठाण्यातील वैद्य प्रयोग शाळेचे मुख्य कार्यकारी अधिकारी किरण गोसावी यांच्याशी संपर्क साधला असता, त्यांनी या वृत्तास दुजोरा दिला. करोना चाचणी केंद्राचे दर एकसाखरेच असावेत, यासाठी बुधवारी चाचणी केंद्र प्रतिनिधींशी बैठक घेतली होती. त्यात चाचणीचे दर कमी करून एकसारखेच करण्याच्या सूचना केल्या होत्या. तसेच हे दर शक्य नसेल तर चाचणी केंद्र बंद करण्यास सांगितले होते. यामुळे गुरूवारी खासगी चाचणी केंद्र काही तासांसाठी बंद ठेवण्यात आली होती. असे असले तरी गुरुवारी सायंकाळी झालेल्या बैठकीत चाचणीचे दर तीन हजार रुपये इतके करण्याचे ठरले असून त्यासाठी चाचणी केंद्रांसोबत आता करार केला जाणार आहे. - गणेश देखमुख, अतिरिक्त आयुक्त, ठाणे महापालिका
