सम-विषम नियमामुळे महिन्यातील निम्मेच दिवस सुरू असणारी ठाणे शहरातील दुकाने शनिवारपासून आठवडय़ातील सातही दिवस सुरू राहतील. पालकमंत्री एकनाथ शिंदे यांच्या अध्यक्षतेखाली गुरुवारी महापालिका अधिकारी आणि व्यापाऱ्यांची बैठक पार पडली. त्यात हा निर्णय घेण्यात आला. दुकानांमध्ये गर्दी होणार नाही याची विशेष दक्षता घेण्याच्या सुचना व्यापाऱ्यांना बैठकीत देण्यात आल्या. सकाळी ९ ते रात्री ७ वाजेपर्यंत शहरातील सर्व दुकाने खुली करण्यास परवानगी देण्यात आली असली तरी मॉल, वाणिज्य संकुल, व्यायामशाळा आणि तरण तलाव खुले करण्याबाबत आद्याप निर्णय घेण्यात आलेला नाही. याबाबत आढावा घेऊन पुढील निर्णय घेऊ, असे पालकमंत्री शिंदे यांनी यावेळी स्पष्ट केले.